Khawvelin May 6-ah King Charles III lal lukhum khumtir a thlir dawn a, tun hma tihdanin engkim kalpui tum a ni a. Lallukhum inkhum tir hi khawvel hmun hrang hrangah tihdan mak danglam tak taka kalpui a ni a.
Queen bawkvaka kal atanga lal thutthleng thut ngai miah lohna te pawh a awm a. “Monarchy hi puithu taka serha kalpui thin a ni” tiin Dr Elena Woodacre University of Winchester a renaissance history reader chuan a sawi.
“Lallukhum inkhum tirnaah thil hrang hrang hmuhin a awm thin a. Thil eng emaw mak danglam tak thawmhnaw serh leh sang leh hriak thihna mak danglam tak te pawh a awm thin” tiin a sawi bawk.
“Heng te hi sovereign tihtur nemnghehna mai bakah monarch leh an thuhnuaia awm te inlaichinna leh inzawmna tarlanna anga ngaih a ni bawk,” tiin a sawi.
-- Advertisement --
Malsawm tui leh Thailang bawkvak lalnu
King Charles III chu secret recipe hmanga siam holy oil thih a ni dawn a. Archbishop of Canterbury chuan King Charles lu ah, awmah leh kutah roreltu spiritual status lantirna pawimawh bera ngaihah te leh Church of England hotu lu a nihna angin hriat thih a ni dawn a ni.
Thailand-ah chuan coronation ceremony-ah tui tel ve thoin monarch thar chu ‘tihthianghlim’ leh hriak thih thin a ni.
Tui te hi Thailand hmun hrang hrang 100 chuang atangin local time 11:52 atanga 12:38 inkar Thai astrology a special time ah lakkhawm thin niin chu chu Buddhist ceremony hmanga malsawm phawt a ni thin.
Tun hnai lawka Thai coronation neihnaah King Maha Vajiralongkorn nupui Queen Suthida chu a pasal hmah bawkvaka thingthiin a awm a. Hei hi Queen lak luh a nih dawna tih thin dan niin inzahna lantirna a ni a. Chumi hnuah King chuan conch shell atangin anointment water chu Queen Suthida thihin royal rank leh status a pe zui nghal a ni.
|hut nana thianghlim lutuk
King Charles chu Coronation Chair-ah service neih chhung hun tam zawk a thu ang. He chair hi oak thing atanga siam niin kum 700 aia upa a ni a, United Kingdom puma furniture upa ber niin tun thlenga siam a nihna chhana la hman zui zel awm chhun a ni bawk.
He chair hi Stone of Destinity tih mai Scottish king te lakluh an nih laia historic symbol hman thin behchhana siam a ni a.
Africa lamah Asantehene chuan kum 1700 chho vel khan Ghana a Ashanti region ah ro a rel a. Ashanti culture a thil seh nasat ber chu ‘Golden Stool’ tih niin Sika Swa Kofi tih a ni a, Ashanti mipui te ‘thlarau’ aiawh anga ngaih a ni.
He thutthleng hi a thianghlim em avangin tumah thut phal a ni lo va, monarch te pawh an thu thiang chuang lo, lallukhum inkhum tir naah Asantehene chu thutthleng chungah chawikan leh chawi hniamin a awm thin a, mahse a thu ngai lo.
Mahse, kum 1900 khan khatih laia Gold Coast British Governor Sir Frederick Hodgson chuan Golden Stool a thut hi ngiat tlatin a sipaite a zawn tir a.
Hei vang hian Asante Queen Mother, Yaa Asantewaa chu a hel phah a. Mahse, hneha awmin British te chuan Asante chu an awpzui a, kum 1935 thleng khan ro an rel khum a ni.
Chungzar, puanzar leh puan
British monarch anointing hi sacred leh secret tia sawi niin service neih chhung zawngin King chu chungzar neihsak thin a ni a. Chutah mipui te chuan auin ‘God Save the King’ an ti zui thin.
Hetiang deuh hian Japanese emperor lal siam dawn pawhin kalpui a ni a. Ceremony neih laiin puanzar nawinawk rawng chu pavilion Takamikura tihah chuan zar niin lalthutthleng hmaa ding Emperor chu lailan zui niin ancient sword leh jewel a bulah dah a ni thin bawk.
Emperor chuan chu mi ni atan bik liau liaua siam yellow-orange robe a inthuamin vantlang hmaah thu a puang zui thin a. Chutah “Banzai” tiin aurual a ni a, chu chu ’emperor dam reng ang che’ tihna a ni.
Sava hmul leh sakeibaknei vun
UK monarch chuan special coronation robes a ha thin bawk a. Westminster Abbey an luh rualin lal ni mai tur chuan red velvet robe gold lace a cheimawi leh white fur man to tak ermine a chei a vet thin.
Coronation tawpah robe dang an ha thin a. Queen Elizabeth II kum 1953 a lallukhum khumtir a nih khan metre sariha sei silk gown UK leh Commonwealth ram 18 te emblem chuanna gold leh silver-a chei mawi leh a chei nana darkar 3,500 lai hman chu a ha a ni.
South Africa-a monarch pariat zinga thiltithei bera ngaih chu Zulu King a ni a. Coronation neihnaah special takin thawmhnaw inbel an nei thin bawk. Zulu King te hian sakeibaknei vun an ha tel thin a ni.
Kum 2022-a King Misuzulu ka Zwelithini lakluh a nih kha chuan keite vunin a inthuam thung.
Calfskin crown
Coronation ritual-a pawimawh ber chu lallukhum a ni a, monarch te roreltu an nihna lantirna a ni a. UK-ah chuan Charles III chu St Edward’s Crown gold frame nei rubies leh sapphires hmanga chei khum tir a ni ang. Coronation cermeony tawp lamah King Charles chu 1.06 kg a rit Imperial State Crown khumtir a ni bawk ang.
Lesotho-ah chuan calfskin headband sava hmula chei mawi chu monarch thar khumtir a ni thin bawk a. Hei bakah hian traditional animal skin leh blue tunic hmanga chei an ha thin bawk.
Lesotho lal Letsie III lallukhum khumtirna kha Maseru a sports stadium ah neih niin King Charles ngei pawhin a telpui a ni.