Kolasib-ah state dang atanga vawk lak khap

Kolasib district-ah African Swine Fever (ASF) leng a la reh fel lo nia hriat a nih avangin ramdang leh state dang atanga vawk leh vawksa rep lakluh khap chhunzawm zel a ni.
Kolasib district magistrate chuan thupek tichhuakin, ASF leng mek chu Kolasib district-ah ziaawm lam a pan nia hriat a nih rualin, hmun thenkhatah he hri hi a la reh fel lo tih hriat a ni a. He hri laka mipui kan him tlan zel theihna’n an district-ah ram dang leh state dang atangin vawk leh vawksa rep lakluh khap a ni a. ASF len lohna state-a APEDA-in a pawmpui farm atangin vawksa atanga siam (frozen pork) lak phal a nih laiin, SOP zawm chungin AH & Vety director phalna lak hmasak tur a ni, a ti.
ASF lenna hmuna puan khua atangin vawk, vawksa atanga siam reng reng Kolasib district-ah lakluh phal a nih loh bakah vawk damlo reng reng talh leh hralh khap a ni a; vawk thi reng reng chinai nen thuk taka phum tur a ni. Vawk thí an awmin, AH&Vety thawktute hnena report tur a ni, tih te a sawi bawk. Thupek hian chhuah a nih atanga ni 60 chhung a huam dawn a, dan bawhchhia an awm chuan Section 188 IPC hmangin hrem an ni dawn tih a sawi a ni.