Kolasib bawrhsap-in an district-a sawrkar hmun pawimawh tlawh
Kolasib district bawrhsap H Dolianbuaia chuan Thawhlehni khan Thingdawl, Kawnpui leh Mualvum-a sawrkar hmun pawimawh a tlawh a, hmasawnna tur leh mamawh awmte a hmunah a enfiah.
Thingdawl Nursing School a tlawhnaah principal Laltanpuii leh thawktuten lo dawngsawngin mamawh an lo thlen a. National highway four lane laih mekin school ram a khawih tel dawn a, zirlai hmeichhia hlir awmna a nih angin an himna (security) kawngah ngaihtuahawm a ni thei, tiin, school campus hungna (fencing) tha an mamawh tih an lo thlena. District Development Plan tharah rooftop solar panel vuah tura hma lakpui turin an ngen bawk.
Thingdawl Nursing School hi tunah hian ANM (Auxiliary Nurse Midwifery) zirna niin, sawrkar laipuiin nursing college-ah (BSc Nursing) hlankai (upgrade) a remti tawh a; infrastructure siam dan tur estimate peihfel a ni tawh tih sawi a ni. PWD-in hma la mekin AMC inthlan zawhfel lamah tender kalpui a nih tur thu sawi a ni bawk.
Nursing School mamawh chu a theih anga lo ngaihven zui a tum thu bawrhsap hian a sawi a ni.
Hemi hnu hian chief medical officer Koalsib Dr R Lalthlamuana hoin national highway kawng laitute camp tlawhin thosilen 75 an pe a. Kolasib district chu malaria natna tlemna hmun (low malaria zone) a nih angin, hnathawktute chu malaria laka him tuma inveng uluk turin an chah.
Kawnpui Primary Health Centre (PHC) a tlawh a. PHC-ah hian tunah doctor pakhat, nurse panga, dental surgeon pakhat leh staff dang an awm mek. An mamawh hrang hrang – dental chair, dental x-ray machine bakah damlo khum hman lai chu a hlui tawh avangin a thar an mamawh a, damdawi in hungna leh thawktu indaihloh thu, a bikin Group-D mamawh a nih thu bawrhsap hnenah hian an lo thlen.
Kawnpui SDO (Civil) office a tlawhnaah SDO leh thawktute nen office thuamthat dan tur leh tihchangtlun theih dan an sawiho.
Hemi hnu hian Mualvum-a 1st IR Battalion Hqrs tlawhin, commandant leh a nauten an lo dawngsawng a. Battalion hmuna security, infrastructure leh hmasawnna tur tlangpui an sawiho bawk.