Kolasib district check point tinah halpuah/ halmawi dap thin dawn

Kolasib district check point tinah
halpuah/ halmawi dap thin dawn
Kolasib district huamchhunga state pawn atanga luhna kawngthuam tinah state sawrkarin a khap halpuah, halmawi leh silai lem a mu kapchhuak thei chi phur lut an awm leh awm loh dap thin a ni dawn.
Ningania Kolasib district bawrhsap Robert C Lalhmangaiha kaihhruaia a kaihnawih department hotute, kohhran hruaitu, village council leh NGO aiawh thukhawm chuan halpuah hal, halmawi hal leh naupang silai lem amu kap chhuak thei khap dan tur an ngaihtuah a. Bawrhsap chuan hunpui laiin nasa takin halpuah leh halmawi hal a ni fo thin a, hun hmasa lamah sawrkarin hma a lo la tawh thin a, hlawhtling taka khap a nih tawh thin rualin, inthlahdul chang a awm thin tih a sawi a. Tun sawrkarin hneh taka khap a duh tih a sawi a ni.
District luhka – Vairengte, Saiphai, Phaisen leh Bairabi check-point ah uluk takin Excise & Narcotics leh Police-in lo dap tura ruahman a ni a. Kolasib khawpui leh district chhunga sub-division hrang hrang huamchhunga kohhran tin hnenah halpuah leh halmawi hal lo tura ngenna semchhuah a; bawrhsap leh superintendent of police kaihhruaina hnuaia VC, YMA leh NGO dangte nena hma lak dan tur sawiho a ni. Diwali denchhena halpuah leh halmawi hal lo tura ngenna siam hmasak pawh rel a ni.
Halpuah hal, halmawi hal leh naupang silai lem amu kap chhuak thei khapna thupek hi kumin September 23 khan Kolasib district magistrate chuan Section 163 of BNSS tlawhchhanin a lo tichhuak tawh a ni.