Kolasib kawng thawmthat loh chuan lirthei tlan loh tum

Kolasib district-a national highway kawngpui thawmthat ngai chu a changtu contractor ten tun thla, August ral hmaa an thawmtha lo a nih chuan lirthei tlan tawh rih lo tura hma lak tum a ni.
Kolasib District Driver’s & Welfare Joint Action Committee chuan an huamchhunga kawngpui, NH.6 kawng chhiat dan leh thawmtha tura hma lak a nih dan chu Thawhlehni khan an endik a. Bilkhawthlir kawng siamtu Ratna company aiawhte hmu in, a rang lama kawng khuar lai lai hnawh turin an ngen a. Sethawn leh Kawnpui inkar kawng siamtu Salam Company aiawhte pawh bia in, hna tha taka an thawh chhunzawm a, lirthei khalhtute leh mipuiin harsatna awm loa an tlan theih nan kawng siamtha thuai turin an ngen.
Sairang kawng pawh an tlawh a, hna thawktuten tha taka kawngchhia hnawh a, lirthei leh a khalhtute thlamuang taka an kal theih nan chak taka hma la turin an hrilh bawk.
August 31 ralhmaa an ngenna hi tihhlawhtlin a nih chuan, Kolasib district huamchhunga lirtheia eizawngtute leh lirthei neituten kawngpui (NH-6) hi siamthat a nih hmaa zawh tawh rih lo turin hma lak an tum tih an sawi a ni.