Kolasib kawngpui siam mekah chak zawka thawh dan tur rel

Kolasib kawngpui siam mekah chak zawka thawh dan tur rel
National Highway 306 leh 06 siam hna thawh mek chak zawka a kal theihnan Kolasib district bawrhsap Robert C Lalhmangaiha kaihhruaiin Joint Action Committee thutkhawm a ni.
NH 306 leh 06 chu Mizoram state luhka kawng a nih angin, a pawimawh tih bawrhsap hian a sawi nawn a. Hei hi hria in NHIDCL leh JAC thawh dunnaah langtlang leh thawhona tha neih a tul tih sawiin, kawngpui tha leh tlo siam a nih theihnan hmanraw tha leh tlo hmang turin NHIDCL aiawhte a chah a, an hmalaknaa harsatna awmte district magistrate hnena thlen hreh lo turin a chah bawk.
Kolasib senior SP David H Lalthangliana pawhin NHIDCL chu NH 306 leh 06 kawng siama hma an laknaah chak zawk leh tha zawka an thawh theihnan work schedule, an hmanraw hman tur leh hmalakna chu Working Group leh Monitoring Team nen inhrilh tha thin turin a chah a. Mizoram mipuiin ram hmasawnna leh sawrkar hmalakna an ngaihvenin, khawtlang leh tlawmngai pawl pawhin sawrkar hmalaknaah hian a thawktute harsatna sutkian kawngah puih an inhuam tih hrereng turin a chah.
NH 306 leh 06 siamthat hna hi NHIDCL hnuaiah Balaji Construction Company-in an thawk a; jungle clearance leh pot hole hnawh hna thawh mek a ni. Kawngpui black top hna chak taka thawk turin an inbuatsaih tan a. 2025 March-ah Vairengte to Bilkhawthlir leh Kolasib to Kawnpui inkar thawmthat hna zo hman tura beisei a ni.