Krishi Vigyan Kendra (KVK) Kolasib ram chu mimal engemawzat tan theh tum nia hriat a ni a. Ram chin thehna chin ‘survey peg’ pawh an kheng nual tih sawi a ni.
The Aizawl Post thudawn danin, KVK Kolasib ram hi a hma pawhin chuhpui an lo ni fo tawh a, tun tumah hian KVK office chuanhnuai, Khamropui panna kawng lamah ‘peg’ hi tam tak khen a ni. Mimal hmun eng zat tan nge theh tum a nih tih sawi mai theih a ni loa, ‘peg’ khenna atanga a lan dan chuan, chhungkaw 50 vel dawn an tlin rin a ni. KVK Kolasib senior head & scientist Dr Michelle C Lallawmkimi chuan hma latute hi an hre loa, hotu sang lamah thil awmdan an thlen tawh a, an ni hmalakna an ngaichang mek tih a sawi.
Hetianga hma latute zawh kualnaah chiang taka sawi thei an awm loa, a awmna, Kolasib Vengthar VC-te chuan an hmalakna a ni lo niawmin an sawi a. Thudawnna thenkhat chuan Kolasib Vengthar Group MNF leh Unit hmalakna niawma sawiin, raltlante hmingin engemawzat pek a, a tam zawk chu party mite tana dah tumna a awm nia an hriat thu an sawi a ni.
2022 October khan Kolasib Vengthar VC hian KVK lam hriatpuina lo bawkin tuna ‘peg’ khenna lai hmun hi mimal ram atan theh tumin hma an lo la tawh tih sawi a ni a. Khawl hmangin hmun engemawzat laih hman a ni nghe nghe. MJA Kolasib District chuan bawrhsap an hmu a, hma la turin an thlen. Bawrhsap hian VC-te chu an hmalakna chawlhsan tura hriattirin a hmunah SDC a tir a ni.
KVK hian loneitute tan hna thawkin hma a la thin a, thlai enkawl leh ranvulh kawngah harsatna awmte zirchiangin KVK mithiamten a enkawl dan farmer-te an zirtir leh thin. Farming lam zirchianna a nih vangin central norms chuan KVK din tur hian hmun zau tak, a lo berah ram hectares 25-a zau a ngai, tih a ni. Kolasib-ah SIRD directorate din a nih dawn khan KVK ram hi sahthlak a ni tawh.
Hetihlai hian Kolasib Khuangpuilama Soil & WC department ram pawh mimal hnena theh tumna a awm thar leh nia sawi a ni a. Nikum khan helai ram hi theh tum ni tawhin, ZPM Thalai chuan dan kalh a nih thu leh dodal an tum thu an lo sawi tawh a ni.
Kolasibah KVK ram mimal tan thet
Get real time updates directly on you device, subscribe now.
Next Post