Zirlai pawl pahnih punkhawm tum

Assembly secretariat hnuaia hnalak chungchangah
Zirtawpni hian zirlai pawl pahnih, MZP leh MSU te’n Assembly secretariat kawta lungawi lohna lantira punkhawm an tum.
“Sorkar hnalakah hian fel fai takin thil hi tih ni se kan duh a, fair taka thil tih ni se kan duh a, fair mai ni lovin fel fai se kan duh a ni,” tiin MZP president Lalnunmawia Pautu chuan a sawi.
Assembly Secretariat hian an hnuaia thawk tur an la thei a, danin a phal angin tunah pawh hna hi an la tih a sawi a, a tlingte chunga rilru tha lo an put vanga lungawi lo an nih loh thu sawiin, “Nakin zelah pawh Assembly Secretariat hian hna hi fair tak leh fel fai takin la se kan duh a. Chu chu kan thu laimu a ni,” a ti.
Tun tum hnalakah hian thil mak tak tak a awm niin a sawi a, a tirah advertisement-ah post panga an ti a, dilna thehluh hun tawp dawnah post pathum an belh tih sawiin, hei hi chanchinbuah an chhuah ve ngei a, mahse tepter taka an chhuah bakah anmahni website-ah pawh a lang hman lo tih a sawi. Chutiang karah chuan thil mumal lo a awm thei tia sawiin, chawpchilh deuhva post pathum belh kha a fel fai loh thlak tiin a sawi bawk.
Zawhna hi pawn lam mi an siamtir tih an sawi a, mahse an siam zawhah anmahni’n an kawl leh reng tho nia a sawi bakah, zawhna hi anmahni siam pawh a awm nia an hriat thu a sawi bawk.
Aia senior kaisan khalh an awm tih an hriat thu te, advertisement ti lova hnalak pawh a awm tih te a sawi a, “An kal dan hi a fel fai lo a ni. |halaite’n hna an zawng a, theihtawp an chhuah a, chutiang a nih laiin fel fai lo takin kan zah em em Assembly Secretariat hi an lo kal ang tih a hlauhawm a ni,” a ti.
MZP president Lalnunmawia Pautu chuan Assembly Secretariat hian recruitment rules pawh 95-a mi an la hmang niin a sawi a, “Office zahawm a ni a, miin an rinhlelh miah loh tura hna an lak hi ram tan a tul kan ti a,” a ti.