Kolkata doctor pawngsual chhui zel

Kolkata hospital chhunga doctor pawngsuala thatzuitu chu a chenna inah hawin a thawmhnaw a suk hmain a mu phawt a, zing lamah a sulhnu thenfai nan a thawmhnaw a su chauh tiin police-te chuan an sawi.
Mahse, polcie-te chuan pawngsualtua puh pheikhawkah chuan thisen hnuhma an hmu hlauh a. He pa hi civic volunteer niin RG Kar Medical College and Hospital-a thawk a ni lo va, mahse, helai chhehvelah hmuh fo thin a ni thung.
Post-graduate trainee hmeichhia pawngsual hnu ruang chu hospital seminar hall chhungah Zirtawpni zingah hmuh niin Inrinni-ah civic volunteer chu man zui nghal a ni.
He sual rapthlak zeta inhnamhnawih te hrem an nih theihnan junior doctor tena lungawilohna an lantir chu Pathianni thleng khan la kalpui zel niin chu chuan West Bengal-a sorkar hospital a tibahlah nasa hle a.
City Police Commissioner Vineet Goyal chuan mecial establishment chu Pathianni khan ni thum chhunga a tum hnih nan tlawhin lungawilohna lantir junior doctor te nena inhmuhna an nei a. An thil chhui mek chu langtlang taka kalpui a nih thu leh thuthang mai mai thehdarh a nih loh nan mipui te hnenah ngenna a siam bawk a.
“Pawi a khawih hnuah thil tisuala puh chuan a chenna panin a mu nghal a, Zirtawpni zing lam thlengin a mu a ni. A thawh hnuah, a thuamhnaw pawi a khawiha a hak te chu a su chauh a. Mahse, dap a nih hnuah a pheikhawkah thisen them hmuh a ni ta a ni,” tiin officer chuan a sawi.
Midang inhnamhnawih an awm em tia zawhna chu, “Tun dinhmunah chuan midang inhnamhnawihna finfiahna engmah kan la hmu lo” tiin officer chuan a chhang a ni.
Doctor thihna avang hian kar kalta Inrinni atanga Pathianni zing lam thleng khan India ram pumah doctor te chuan lungawilohna lantirin nawrh an huaihawt bawk a.
Hetih lai hian he medical college R.G. Kar Medical College and Hospital principal hlui Dr Sandip Ghosh chu CBI te chuan thu zawhfiahna ni thum chhung an nei tawh a ni. Investigating officer te chuan Ghosh call details leh chats te an enfiah mek bawk a. Pawngsual thlen hma leh hnua Ghosh-an phone call a siam te chhui chian hna an thawk mek bawk.
National Commission for Women (NCW) chief Rekha Sharma chuan, “A lan danah he thilah hian mi pakhat chauh an inhnamhnawih hmel loh” tiin a sawi a. West Bengal Chief Minister Mamata Banerjee chu he thila inhnamhnaiwhte thup tumah a puh bawk a.
“He thilah hian mi pakhat chauh an inhnamhnawih hmel loh a, Mamata Banerjee hian midang inhnamhnawih te chu hum a tum niin a lang. Tunah erawh CBI te kutah a awm a, thil inthup engkim an lailang ang,” tiin Sharma chuan a sawi.
Hetih lai hian Kolkata Police te chuan BJP MP Locket Chatterjee leh doctor lar tak pahnih te chu khual thuthang thehdarh leh hmeichhe doctor tualthi chu tu nge a nih lailangah puhin an ko zui a.
“Heng mipathum te bakah hian police-te chuan information dik lo an thehdarh avangin midang 57 te chu thuzawhfiah tura koh an ni,” tiin Kolkata police officer chuan a sawi.