Kolkata-in world cup hero Martinez mikhual

Kolkata-in world cup hero Martinez mikhual
Thawhtanni khan Argentina World Cup-winning goalkeeper Emiliano Martinez chuan Bangladesh khawpui Dhaka atangin football atchilh khawpui Kolkata a thlawklut a, Netaji Subhas Chandra Bose airport-ah Mohun Bagan official langsarte leh mipui za telin an lo dawngsawng.
Kolkata hian khawvela football star ropui ber ber – Pele, Maradona, Messi leh Cafu-te pawh a lo mikhual tawh a, tunah 2022 FIFA World Cup final penalty shootout-a Argentina-in France an hneh theihna kawnga mi pawimawhin Bengali-te khawpui a rap ve leh ta a ni.
Kum 36 chhunga Argentina-in world title an lak hmasakber thlantirtu pawimawh zinga sawi tel loh thiang lo Martinez kha English Premier League club Aston Villa tana khel lai niin, India a luh hma hian Dhaka khawpuiah Bangladesh Prime Minister Sheikh Hasina nen an inkawm a, chuta tangin Kolkata a pan.
Qatar ram World Cup-a goalkeeper tha ber lawmman Golden Glove dawngtu Martinez hi airport-ah lo hmuah a ni a, Indian fan-te chuan Argentina jersey ha chungin an lo lawm a ni.
Argentine chuan Kolkata a thlen ruala amah kawmtute hnenah, “A boruak a pui hle mai. Ram duhawm tak a ni a, he hmun ka lo thleng hi ka hlimin ka phur hle mai. Ka lo tiam tawh angin India leilung chu ka rap ta a, he hmun hi tunhma atanga ka tlawh duh a ni,” a ti.
Martinez hi Kolkata khawpuia Biswa Bangla Mela Prangan vengah sikul naupang 500 rualte nen hun an hmang a, chumi hnuah Mohun Bagan football club lam panpui niin, he hmunah hian Bhaskar Ganguly leh Hemanta Dora telin Bengal goalkeeper 10-te chawimawina hun a hmanpui.
Nimin khan Mohun Bagan All Stars leh Kolkata Police All Stars ‘exhibition match’ thlir tura ruahman niin, Santosh Mitra Square-a football clinic-ah Indian footballer naupang inzir mekte hmaa thu sawi tura tih a ni bawk.
Tarlan tawh angin, City of Joy an tih hi Soviet goalkeeping great Lev Yashin pawh khan vawihnih ngawt tlawh tawhin, a hmasa zawk chu kum 1955-a Soviet team-in India leilunga tour an kalpui tum kha niin, a dang leh chu kum 1973 IFA Shield final-a chief guest-a a rawn tan kha a ni.
Kum 1977-a New York Cosmos leh Mohun Bagan-in exhibition match an khelh tum khan Pele leh World Cupper ve bawk Carlos Alberto pawhin he khawpui hi an lo chingphul tawh bawk a ni.
World Cup-a tum hnih Argentina champion-pui tawhtu Diego Maradona pawhin tum hnih ngawt Kolkata hi tlawh tawhin, kum 2017 khan he khawpuia World Cup trophy a keng lai lim chu a rawn hawng a, fans sang tam takin an lo lawm.
German leh Bayern Munich legend Oliver Kahn-a’n competitive football a thlahliamna farewell exhibition match pawh kum 2008 khan he khawpuiah hian Bayern leh Mohun Bagan-in an khel a, Kolkata khelmualah German mihrang Kahn a inlan.
Gerd Muller, Karl Heinze Rummi-niege leh Diego Forlan-te pawh Kolkata mikhual zingah an tel tawh bawk.