Kolkata leh Marathwada-ah ruah kaihhnawihah mi 18 thi tawh

Kolkata leh Marathwada-ah ruah kaihhnawihah mi 18 thi tawh
West Bengal khawpui, Kolkata-ah ruah sur nasa kaihhnawiha chhiatna hrang hrang thlengah mi 10 vel an thi a, hetih lai hian Maharashtra laili, Marathwada ram bial chhungah pawh tun hnaiah mi pariat vel an thi bawk.
Kolkata-ah hian Thawhtanni zan atang khan zankhuaa ruah surin hmun tam takah tui a tling nasa hle a. Beniapukur, Kalikapur, Netaji Nagar, Gariahat, Ekbalpur, Behala leh Haridevpur-ah thihna a thleng a. Heng hmunte hi khawpui laili leh chhim lam a ni a, thi zinga pakua vel hi electric-in a man an ni.
Kolkata tumhmuna thlawhna che vel pawh a buai phah hle a. Thlawhna 100 chuang zinga 62 chu an zin tur thulh niin 42 tihkhawtlai an ni a, an chuang tur tumhmunah an tangkhang nasa hle.
Khawlaia tui tlingin lirthei kal vel bakah suburban rail leh metro service a tibuai a. Hmun hniam lai deuhvah chuan inah tui lutin thil a tichhe nual a, sikul tam tak an chawl bawk.
Ruah hi khawpui laili leh khawchhak lamah a sur nasa zual a. Kolkata Municipal Corporation chuan Garia Kamdahari-ah darkar rei lo te chhungin mm 332 a sur a, Jodhpur Park-ah mm 285, Kalighat-ah mm 280, Topsia-ah mm 275 leh Ballygunge-ah mm 264 a sur bawk tih an sawi.
Weather office chuan Bay of Bengal atanga ruah keng thli vang nia sawiin a la sur zui dawn niin an sawi.
Kolkata-a ruah sur hi Durga Puja hmang tura an inbuatsaih ngawrh lai tak niin City of Joy an tihah hian khawvel hmun hrang hrang atangin puja pandal chhim turin an pungkhawm thin a, a huaihawttute chuan thla eng emaw zat an lo buaipui tawh tam tak a chhia tih an sawi.
Kolkata mayor, Trinamool Congress hruaitu, Firhad Hakim-a chuan tun anga khawpuia tui tling nasa a la hre nga lo tih a sawi a. “Kan vengah pawh a nasa hle a, ka la hmu ngai lo. Corporation chuan a tuartute tan ei tur awmna a ngaihtuahsak a. Ruah a sur belh loh chuan dinhmun a pangngai leh nghal kan beisei,” a ti.
Calcutta Electric Supply Corporation chuan mipuite chu khawlaia tui tlinga an awm pawhin wire leh electric ban hnaiha awm lo turin an chah.
Maharashtra-a khua a khen fona thin, Marathwada-ah pawh ni li liam ta chhunga ruah tam tak sur avangin mi pariat thi an awm tawh a, Dharashiv district-ah phei chuan khaw 159-ah tui a lian mek a. Thuneitute chuan helai ram biala kum 50 chuang hnua ruah a sur tam ber tum niin an sawi.
In 750 chuang a chhia a, ran vulh 186 an thi a, thlai chinna hectare 33,000 chuanga zau tuiin a tichhia a. Jalna leh Beed-ah lei pathum a chhia a, Chhatrapati Sambhajinagar-ah sikul pahnih leh Marathwada-a tuikhuah tenau panga a chhe bawk.
Maharashtra Disaster Management Minister Girish Mahajan-a chuan, “Dinhmun a khirh rih hle a. Kum 50 atanga 70 vel liam ta atanga chhut letin tun anga ruah sur nasa hi a la awm lo. Khaw tam tak tuiin a chim a, tuiin lei tha a len a, lo neituten an thlai leh an ran vulh an chân nasa,” a ti.
Agriculture Minister Dattatray Bharne pawhin an state pumah lo acre nuai 63.51 vela zau a chhia a, an thil hloh hlut zawng hi hriat mai theih a la ni lo tih a sawi.
Jayakwadi leh Majalgaon tuikhuah chhehvela ruah sur nasa avangin tui sah a ni a, hei hian Chhatrapati Sambhajinagar, Jalna leh Beed-ah tui a tilian zual.
Chief Minister Devendra Fadnavis-a chuan, “National Disaster Response Force (NDRF)-in Dharashiv-ah mi 27 chhan chhuakin hmun himah mi 200 sawn an ni bawk,” a ti.
June 1 atang khan Marathwada-ah hian ruah an dawn thin pangngai aia 28.5%-a tam surin Dharashiv-ah 148%-a tam a sur tawh bawk.
Sorkarin lo neitute tan chhawmdawlna tur Rs vaibelchhe 2,215 a ruahman a, nuai 31.64-in an dawng tawh.