Krismas-ah eng nge i present dawn?

November thla chawhnu lam kan lo chuangkai leh ta a, Krismas rim a nam leh tan tawh, kan inrin hmain ‘masi’ kan urlawk leh mai dawn a, he hunah hian a hmei a pain kan hmangaih te thilpek pek tur kan ngaihtuah a. “Eng nge a duh zawng ni ang aw?” tiin kan rilru a inkhap nasa hle thin.
Khaile, mipa leh hmeichhe tan, kawppui/ngaihzawng te pek chi deuh deuh te kan rawng tarlang dawn a, a hmasain mipain a ngaihzawng/kawppui tana a present tur kan sawi phawt ang.
1. Hmeichhia ten present tuamna han hawn vel hi nuam an ti riau a, bawm lian deuh takah, ribbon nen mawi takin tuam la, a chhungah chuan lehkhabu te, chocolate, toys, tlereuh tih velte han dahkhawm la, chubakah card, i hming ziak ngei kha dah tel bawk ang che.
2. Hmeichhia ten tlereuh an lawm tlangpui a, lunghlu leh rangkachak te hi hmeichhiain an lawm hle a ni, sum leh pai lamah i harsa lem lo a nih chuan bengbeh emaw thi emaw zungbun emaw, lunghlu tel ngeina present teh. Sum chu seng deuh mah la a manhla i ti viau ang.
3. Hmeichhe nui hmel i hmuh duh chuan thawmhnaw thar lei sak la. Bazar nuam ti lo hmeichhia an vang khawp ang, chuvangin bazar pui la, a duh duh thlan tir mai rawh.
4. Gadgets hi mipa chauhin kan lawm tawh lo, smartphone atanga tablet PC leh digital camera thlengin hmeichhia ten an lawm ve vek.
5. Spa-ah kal pui teh, kan khawtual-ah pawh beauty salon a awm nual tawh a, body massage an ti thei deuh fur tawh. Chu chu Krismas present atan tihchi tak a ni.
6. Hnuailam thawmhnaw sexy tak present teh, i rin phak bakin a lawm ang.
Hmeichhe-in mipa chu eng nge a present ve tak ang?
Mipa thilpek i dawng a, nangin pek let ve tumna i neih si loh chuan a fuh lo ang. Present dawn nuam i tih ang bawkin mipa pawhin nuam a ti ve tho a nia, mahse, mipain a pek ang che rulhna ang zawnga a kal chuan a fuh lo ang. Chuti a nih si chuan, eng nge i pek ve tak ang.
1. Sum leh pai lamah i harsa lutuk lo a nih chuan sana tha ve pangngai tak present teh, mipa chu a lawm ngawt ang. Tunlaiah smartphone kan hum vek tawh a, dar zat phone-ah kan en vek thei tawh thonain sana hlutna a la bo chuang lo.
2. Mipa chu infiamna lam ngaina a nih a, eng infiamna ber emaw tuipui deuh bik a neih chuan chutiang lam hawi thilpek tur zawng la, i tisual lo ang.
3. Thlasik lai chuan lirthei khalh, a bikin two-wheeler ah a ni lehzual a, boruak a vawh avangin kut a hik mum mum thei hial thin. Chutiang hunah a kut tihlumna tur kutkawr tha ve pangngai, savun kutkawr te ni thei se, present la i tisual lo ang. Hmeichhe scooter khalh pawh kan tam ta a, mipa tan pawh hetiang hi present chi a ni ve tho bawk e.