KRISMAS CHIBAI

JC.Zoremi Hmar Joute

Khai le…kum 2024 krismas chuan hnâi takah min hmuak leh ta ruau mai le! Hei, masi hmaa kan thu hnuhnung ber tur kan ziak chu a ni ta dêr mai a, thlasik laia khua a vawt thin te, khua a vawh laia Masi a’n ni tlat maite hi inhmeh deuh mai a nia!Masi hi nipui lai ni ta se, khua a lum dawn tihna a ni a; khaw lum lai a nih chuan Masi-ah chuan khua a vawh thin si avangin Masi a ni dawn lo tihna a ni bawk si a, Masi a bo a ni mai! Kan rama sawrkar apiangte hian inanna leh eng party pawhina inthurualna an neih zinga pakhat chu, an sawrkar apianga thlasika khaw vawt ziah hi a nih ka ring! Mipuite paw’n kan sawrkar thar hi i dem lovang u!
Kan naupan lai khan awm ve la chuan maw:
“Masi a hun, tlângsam a pâr, kawr thar neih a hun e,” tiin thingtlang lam naupang chu kan zai leh del del tawh ang a. Vawt ti kun hlau hlau chungin tui kan chawi ang a. Tlângsam pâr tan, la parh chiah lote chu thlir pahin, pâr tak tak tawh se kan ti rilru leh tawh viau ang; a pàr hun hun Masi! =ângtial veh tur an rêm deuh tan avangin kamram atan serthlum lamah kan tuan ang a. Thla hnih liam ta vela zawngtah tuvu-a kan invuak fiam chiamna hmuna zawngtah ngei kha a neitu ten zuarin, kan hmeh leh deuh reng tawh ang.
Buhban thàr hlim, hmui chêk mai chhum te chu kan dawm leh larh larh tawh ang a, thimhlimah pên za dan lek lekah awmtual mei ài tur a awm leh fur tawh ang. Naupang harh khawvawt hre lo tih takah, in atanga chhuah laia vawt ti lo, thawmhnaw lum inbel tha peih lote pawhin khua a lo thim meuh chuan bân tàwm cháihin meilum chu kan pan leh chau chau ang a, tuah tur thingbul fawm khâwm zingah rem lo féin mawng sâwi láihin kan thu âwn leh tài hlawm ang. Masi kawr lei tura nute emaw, pate emaw Aizawl zin tur nei kan awm a nih vaih chuan, kan hriat veleh thiante hnenah kan report nghal thuai tur a ni a, eng nge kan chah kan sawi tel ngei ngei a ngai leh bawk dawn a ni.
Nu emaw, pa emaw mai ni lo, mahni ngei zin tur kan awm ngat phei chuan kan sawi chhuah bak tawng zui suah suah loh tur, kan thiante khan min biain, thil min chah sup sup dawn a, chu chu lo chhan that duh vak loh vel mai mai tur! Masi bawng kaihnaa kal tum kan ni leh deuh vek tur a ni a, masi vawk talh huna a phîng lo hual lawk hi pathum tal an awm bawk tur a ni. Ba chhum leh chi lek chhuak ten, kan ei zawhah kut sil maina tur a awm hnaih loh chuan, vaivutah kut sil ila, bâl kenna kut berh leh ban chu a fai awlsam ber! Chhang ban lo ngen thawt thawt loh tur, kan nu ten, masi hunah kan ei dawn tho alawm an ti zel tho.
Dawhthlak tura duhthu sàmin tawng inchuh zan tin tur. Tin, exam-pui kan zawh tawh avangin zan tin len tur a ni tawp mai a ni. Kan indo lemna thin, kan bihrukna hnim pik te an khawro deuh tawh avangin indo lem rawt nulh nulh loh tur. Tuk tin kutzungtang thliakin, masi thlen nan ni engzat nge la awm tih kan chhiar ziah a, tlângsam pâr parh danah kan chhût thiam hle bawk. Urlawk ni a lo thleng ang a, nu ten chhang an dêng ngei ngei dawn; a mawng khâk ei turin kal ve ngei ngei tur a ni a, kamsir var luaia ei a, zanah vawih set set tur, a manhla bik a, krismas ti-Masi-tu a ni! Mahse engati nge Laldinga khan a zai khan, “Rem lal pian hun Champhai…” a tih zel le?!
Masi tuk a lo thleng ang a. I dawhthlak kengin thawh veleh i lêng nal nal ang. I thiante tu pawh hmu la, “Krismas chibai,” tih a ngai lo. “Eng nge i dawh thlâk?” tih daih tur, a pà daih zawk! Mahse mahni nute hnenah “Eng nge i dawhthlak,” tih loh tur, nuih tut bak chhanna i dawng chuang lovang. Masi urlawk niin nu ten nawhlunga min nâwt a, min buàl tah tuarh tuarh tawh tho avangin inbual tih vel kha a ngai tawh lo va, hmai erawh phih tur. Tin, i phih chin kha a lang hle tur a ni. Chuti lo chu thingtlang naupang nih i tlin lo tihna a ni a, a mawi lo! Ruai theh dawnah pawh chuti tho chuan aw.
Tunah erawh:
Ka fate hi ka thlir a, an krismas hman dan hi. Lo puitling ta pawh ni se, panlai krismas titi tur an nei mang dawn hian ka hre lo va, ka lainat letling ngawt nia! Chhangban an ngaina tawh lova. Kan nu ten chhang fun tereuh te min siamsak, a ahna hrui an siam thlap mai ak a, zingkara intithei taka kan lên thin thu te chuan an nuih a tiza mai mai tawh a. Zana kan carol ve thin thu leh, kan hlawh thin tlangpui chu Ba chhum leh kurtai a nih thu kan sawi pawhin,a nawm an ring chuang lo! Gift, mawi taka tuam, krismas tree hnuaia kan dah thin ai hian, kan masi kawr, metre-a sawmriat man ngei mai kha a hlu lo bik tawp si lo va!
Krismas cake an zai thin leh, urlawk zana chhangban kan, tlaivar ngei tum chunga muthlu lawrh lawrh paha kan ei kha, a tui dan a dang chuang lo asin. Tlaivar kha kan han tum thin em em khawp ahh…dar sawm meng thleng chu a tukah chuan thiante zingah ‘tlaivar chiang ngei mai’ kha kan ni tho; a va’n lunglenthlak mai mai ve le! Masi in kan cheina, balloon lian phek phuk leh tê deuh te, lehkha mawi cheh zum, maida hmanga hruia kan chàr beh, in chhunga kan zam nuaih mai te kha mawi ka la ti reng a, tun laia in kan cheina, krismas tree leh thil êng mawi neuh neuh ilo fahran, nalh tak tak nen hian an inhlut hleihna sawi chiam tur ka hre bik lo reng reng!
Kan insawi lungleng zual takngial dawn e, vawiin thlenga dam taka min hruaitu kan Pathian hnenah lawmthu awm se la. Harsatna avanga a biakbuka Lal piang chibai bûk thei ta lo pawh ni ila, kan thinlung chhung ril ber atang hian chibai kan bûk theuh ang tih hi ka ring tlat a ni. Fam zûn ngai leh thinlung nâ te, natna khuma mu mekte leh, chhungkuaa krismas hmang thei lo pawh kan lo ni ang, chatuan nunna kan neih theih chhan, a aia hlu leh chuang awm tawh lo Lal Isua Krista ngei chuan, thlamuanna chiar sèn loh nen vengin awmpui tlat cheu rawh se; The Aizawl Post chhungkua zawng zawng, krismas chibai/hman nuam vek u le.