Kristian kan nih lanna tur chu, corruption awm lohna state nih – Vanlalhmuaka

Kristian kan nih lanna tur chu,
corruption awm lohna state nih
– Vanlalhmuaka
Kristian kan nihna a lanna tur chu kan ram hi corruption awm lohna state a nih a ni tih BJP Mizoram president Vanlalhmuaka chuan a sawi.
Thawhtannia an party office-a inkhawmah BJP State president chuan, kan chhehvela cheng ringlomiten keimahni ah Kristianna an hmuh a pawimawh hle tih a sawi a. Thusawiah chauh kan Kristianna a lan chuan ringlomiten Kristian hlutna an hmu thei lo, tiin, “Kristian kan nihna lanna tur chu, kan ram hi corruption awm lohna state a nih a, an hmuh a, an hriat a, development hnathawh reng rengah kan hna a tha hle tur a ni a, khawtlang nuna kan Kristianna a taka a lan hunah Mizoram lam an rawn hawi tawh ang,” a ti.
Zirna kawngah pawh state chhunga kal ve theihnaah phailama ringlomite zirtirna in kan pan a, hei pawh hi kan insiamthat a, kohhran hruaitute leh sawrkara kan hotu lianten, kan state chhunga zir ve theihna reng zirnaah chuan an fate kal tir se, tun ai hian zirna lamah hma kan sawn ngeiin a rinawm tih a sawi a ni.
Ram dang leh hnam dangin kan Kristianna avanga kan ram leh hnam chu rinawm leh entawntlak an ni, an tih hun a nghahhlelhawm tih Vanlalhmuaka hian sawiin, “Politics kan khelh tak avangin Pathian thu nena inhlat taka awm angah mipui hian ngai thin lo ila, politics atang hian Pathian thu tak hmangin kan ram hi a kaihhruai theih a, ram siamthatnaah Pathian hi a laiah kan dah tur a ni,” a ti. Chutianga kan dah ngam chuan tuna Mizoramin harsatna kan tawh tam tak chu siamtha in, kan harsatna lak ata khai chhuahna kawng min hawn sak ngei dawn tih a sawi a ni.