Mission Veng MUP-in jubilee lawm

Mission Veng MUP-in jubilee lawm
Mizoram Upa Pawl Mission Veng Branch chuan an kum 50 tlin, Golden Jubilee chu Thawhtanni khan an lawm a. Aizawl South II bialtu MLA Lalchhuanthanga bakah AMC Ward No. XVIII corporator Malsawmzuala Ralte ten an hmanpui.
Bialtu MLA chuan upate chu Sawrkar laipui leh UNO thleng pawha ngaihpawimawh hlawh tak an ni, tiin, hmanlai finna tunlai thlenga min rochuntute an ni tih a sawi. Tawnhriat tha tak tak paw chhuaktu an ni tih sawiin, upa pawl member-te chu bial chhung tihmasawnna tura thawhhopuiah a sawm a. Bial chhunga hmasawnnna chi hrang hrangah upate thurawn lak fo a pawimawh, tiin, an tu leh fate hmasawnnna tura ngaihtuahna senpui thin turin a sawm a ni.
AMC corporator chuan upate chu an hluin zah an phu a, hei hi hriain tunlaiah pawl tam takin senior advisor-te an lo nei ta tih a sawi a. Upate thurawn lak nachang hriat chu pawl kal dikna tura thil pawimawh tak a ni tih a sawi.
MUP Mission Veng Branch hi 1974 November 4-a din a ni. Hruaitu hlui la damte hnenah chawimawina hlan niin, kum 90 tling tawh mi 13 lawmpuina thilpek hlan an ni bawk.