Kristiante inhumhimna tur chu INC vote tlin a ni – Lal Thanzara

Mizo Kristiante kan inhumhimna awmchhun chu Indian National Congress kan vote tlin hi a ni tih Congress president Lal Thanzara chuan a sawi.
MP inthlan atana Serchhip district-a an fehchhuahnaah MPCC president chuan tun MP inthlana an khingpuite chu pa tha tak an nih ve ve rualin, BJP talhfiak, RSS, Bajrang Dal leh VHP nena thawkho an ni, tiin, thlantlin a nih chuan BJP lama a thut tur thu sawi ngattu MNF candidate leh BJP rizai an sin ve dawn lo tih sawichiang ngam lo, a tul dan azirin tih bak sawi thei lo ZPM candidate chu an tling a nih chuan Parliament-a an ban pharna tur lam a chiang sa a. Mizo Kristiante inhumhimna awmchhun chu INC vote tlin a ni, tiin a sawi.
“Hindu firfiak, RSS, Bajrang Dal leh VHP te tum ber chu Kristian sakhua leh Congress party nuai chimih a ni. Kan Kristianna leh missionary-te thlavang hauh a, BJP nek tak tak ngam tur chu Congress party chauh hi kan ni. Congress candidate Pu Lalbiakzama hi, mahni party dahtha in, kan sakhua humhim a nih theih nana vote vek turin Zoram mipui kan ngen a ni,” Lal Thanzara hian a ti.
INC MP candidate Lalbiakzama chuan BJP hi Parliament inthlanah an sawrkar nawn leh a nih chuan India hi democracy a ni reng angem tih hi hriat a ni tawh lo, tia sawiin, “He thil avang hian India rama mithiamte leh mi thil chikmite an rilru a hah hle. Jammu & Kahmir state, Muslim chen tamna a nih avanga an inhumhimna an nuaibo sak dante, Manipur-a Kristian biak in an suasam dan leh an hal chhiat dan en hian BJP an sawrkar nawn leh a nih chuan India mithiam leh thil chikmite rin dan ang ngeiin, BJP hian democracy hi an nuaibo ngei a rinawm a. Chutih hunah chuan Mizo Kristiante hi kan him a rinawm bik loh,” a ti.
ZPM leh MNF candidate-te chu BJP thawhpuia BJP lama ban phar tur an nih miau avangin, Mizo mipuiin kan vote thlakna tur uluk taka ngaihtuah a, eng party candidate nge vote ila kan ram, kan hnam, kan sakhua a him theih ang, tih rilru pu chunga vote thlak turin Zoram mipui a chah tih a sawi bawk.