KTP general conference Palai 19000 chuang tawh

Mizorama Thalai Inkhawmpui lian ber Kristian Thalai Pawl (KTP) General Conference vawi 60-na, Ngopa Public Playground-a nghah chu neih chhunzawm zel a ni a, Zirtawpni chhun thleng khan palai mi 17000 chuang an inziaklut tawh a, counter-a in report lem lo nen chuan mi 19000 an chuang tawh tih sawi a ni.
Ningani zan khan inkhawmpui hi tan a ni a, Conference Diamond Jubilee mei hi Synod executive secretary i/c KTP Rev Dr K Lallawmzuala’n a det a ni. Zirtawpni chawhma kha rawngbawlna report inkhawm a ni a, chawhnuah Jubilee zaikhawmpui neih a ni a, zanah Pathian biak inkhawm neih a ni.
Vawiin, March 2 chawhma dar 10-ah Ngopa Chhimveng Presbyterian Kohhran biak inah hruaitu thlan leh rorel inkhawm neih a ni anga, rorel hlan hian pandal-ah programme a awm ang. Chawhmaah thu zir ‘Thalaite Rawngbawlna hmathlir’ tih thupuia hmangin Synod Partnership Committee secretary Rev Z John Malsawma Colney chuan a sawi anga, chawhnuah variety programme niin, zanah Pathian biak inkhawm a awm ang. Zan inkhawm banah Diamond Jubilee Concert neih chhunzawm a ni ang.
Inrinni zan, Pathianni chawhma leh chawhnuah conference thupui ngaihthlak a ni anga, thupui hi “Midang tana malsawmna” (Genesis 12:2) niin, speaker chu Rev Dr H Vanlalruata a ni. Conference hian March 3 (Pathianni) zan thleng a awh ang.
Tunah hian KTP bial 217 awmin branch 904 a awm a, member mipa 104736 leh hmeichhia 66668, an vaiin member 171404 an awm a ni. Kum 2023 chhung khan member thi 552 an awm a, an zinga 484 hi mipa, 68 chu hmeichhia a ni. Member innei zat 3460 an awm a, biak ina innei (dan khatna) zat 1541 (44.54%) niin, hmun danga innei 1919 (55.46%) an ni.
2023 April 1 atanga kumin February 20 chhunga sum dinhmun report-ah, Central KTP budget hi Rs. 84,70,000 a ni a. Kum 2023- 2024 chhung hian Rs. 87,46,640 hmuh niin, Rs. 53,86,182 hman a ni.