Kudermetova a champion

Pathianni zan khan Pan Pacific Open final khelh a ni a, Veronika Kudermetova chuan a khingpui Jessica Pegula chu set hloh lovin a hneh a, a champion.
Tokyo khawpuia hmeichhe final-ah hian quarter-final-a world no. 1 Iga Swiatek hnehtu Veronika Kudermetova-i’n tha takin bul a tan. Set khatnaah break a neih nghal mai vangin 3-0 in hma a hruai nghal. Awlsam taka set hmasa la tura ngaih a nih laiin a khingpuiin tha zetin a bei let a, 5-5 a ni ta hial. Hun pawimawh takah Kudemetova-in break a nei nawn leh a, game nga hloh chungin set khatna a la.
Harsa taka set a lak hnuin set hnihnaah a khel tha leh zual. Set hnihnaah hian break a nei zawn a, game khat chiah hloh chungin set a la nawn leh a. 7-5, 6-1 a hnehna changin a champion a, hei hi WTA Tour-ah vawi hnih a champion na a ni.
Hmeichhe lamah inelna dang Ningbo Open final-ah Ons Jabeur chuan minute 78 chhungin a khingpui Diana Shnaider a hneh fel hman a, awlsam takin a champion. World No. 7 Jabeur hian set khatnaah game hnih chauh a hloh a, set hnihnaa a chak awlsam lehzual a. 6-2, 6-1 a chakin a champion.