A chung berah Foxes

Pathianni zana Championship khelhah Leicester City chuan an khingpui Blackburn Rovers chu 4-1 in an hneh a, table chung berah an kir leh nghal.
EPL atanga tlahniam Leicester City hi Blackburn hmachhawn turin Ewood Park-ah an leng lut a, mikhual an nihna hmunah an khel tha a, an huangtau hle. Inkhel tan atanga minute lina lekah Wout Faes chuan hmahruaina goal a thun nghal der. Hma takah goal chuah mah se mualneitu Blackburn an buai mai lova, an insiamtha thuai. Goal an chhuah atanga minute nga hnu lekah Sammie Szmodics goal thun hmangin an si phurh an sut.
1-1 a nih hnuin Foxes an khel tha ta viau a, goal thum an thun belh zui leh. Minute 28-naah Jamie Vardy chuan hma an hruai nawn lehna goal a thun. Vardy goal hmang hian hun rei tak chhung hma an hruai a, hun tawp dawn hnaihah goal hnih an thun belh leh bawk. 2-1 a hmahruai tawh Foxes tan hian minute 82-naah Kelechi Iheanacho chuan an goal thumna thunin an hmahruaina a tizau a. Minute 88-naah Kiernan Dewsbury-Hall chuan an goal lina thunin, an chakna a nem nghet. Hun tawp thlengin goal dang a luh belh tawh lova, Leicester City chuan an len luhna mualah Ewood Park-a 4-1 a hnehna changin, point thum an hmu.
Foxes hian Championship-ah vawi kua khel tawhin, point 24 an hmu a, point hniha Ipswich Town lehpelin table chung berah an kir le nghal. Blackburn hian khelh 9 atangin point 10 chiah an hmu a, 18-naah daih an awm ve thung.