Kuhva chin belh phal tawh loh thu sawitu CM-in finfiahna pe lo – Congress Thalai

India sawrkarin kuhva chin belh a phal tawh lo nia sawitu chief minister Lalduhoma hnena finfiahna an dilna chu pek an ni lo tih Congress Thalai chuan an sawi.
Congress Thalai hian August 26 khan chief minister hnenah hian August 21-a Assembly thutkhawma sawrkar laipuiin kuhva chin belh a phal tawh lo nia a sawi chungchangah, chin belh a phal lohna order copy dilna lehkha an thehluh tih sawiin, RTI dan hmanga department lama zawt tura tihna chu lehkha in Chief Minister Office atanga chhan an ni tih a sawi.
‘Chief minister thusawi hian Mizorama kuhva chingtute a thawng hle a. Fianfiahna mumal nei loa thusawi mai mai thin a nih zia a nemnghetah kan ngai. Kuhva chin belh phal lohna dan engmah nei si loa RTI dan hmanga department lama dil tura a lo ti daih hi mak kan ti a. Chief minister berin Assembly House-ah RTI hmanga zawhna chhanna a rintlak loh tih a sawi bawk si a, Pu Lalduhoma hi kuthnathawktute tana rintlak lo leh innghahna tlak a nih loh zia tichiangtu ah kan ngai a ni,’ a ti.
Kuthnathawktute tana hmalakna tha lo leh anmahni tihnual zawnga thusawi reng reng na takin an do zel dawn a. Tuna chief minister-in kuhva chingtute harsatna sutkian aia central-a BJP sawrkarin kuhva chin belh a khapna a pawmpui zawk hian kuthnathawktute zahlohnaah an ngai bawk tih Congress Thalai hian an sawi.