Kuhva hralhnaah puih an ngai loah sawrkarin a ngai

Tualchhunga kuhva chingtute chu an kuhva rah hralh kawngah puih an ngai loah sawrkarin a ngai a, chutihlaiin a sawngbawlna lamah chuan Bana Kaih policy hnuaiah hma lak tum a ni tih Agriculture minister PC Vanlalruata chuan a sawi.
Assembly Session-ah Hachhek bialtu MLA Robert Romawia Royte chuan kuhva chu Mizorama thlai mala sum lakluh tam na ber nia a rin thu sawiin, sawrkarin thlai thar lei tur a thlan zingah engvanga telh ve lo nge a nih tih a zawt a. Sawrkar kum thara an telh loh pawhin a kum lehah tal telh tura a ngen bakah SEDP hnuaia kuhva chin lama bul tan tura thlante tal chu ngaihven zui nise a duh thu a sawi
Agriculture minister chuan tualchhunga kuhva chinte a hralhna lamah harsatna a awm hran lo nia an hriat avangin thlai thar lei tur zingah ZPM sawrkarin kuhva a dah tel lo tih a sawi a. ZPM-in policy a lo neih sa tawh angin, thlai thar lei a tum danah a thlaia va leisak tak tak lam ni loin, society leh loneitute inkarah a pawp awm palh hnawhna atan sum an dah mai zawk tih a sawi a. Sawhthing leh thlai thenkhat rate mumal lo lutuk leh kuthnathawktute thlai china rate ngelnghet siamsak a nih loh avangin, a rate hre saa hna an thawh ve theih tawh nana duan a ni tih a sawi a ni.
Minimum support price pe turin tuna thlai thlan bik atan cheng vaibelchhe 110 pawh hi dah a ni, tiin, “Kuhva hi kan ngaipawimawh lo a ni loa, a chingtute an buai lo a, rate a tlahniam vak lo a, a hmuna lei thin hnamdang hoin an lei chilh mai thin. Chutihlaiin, hlawk zawka hralh a nih theih nan Bana Kaih policy hnuaiah a ‘skop’ a hralh a nih theih nan leh a tih ro dan te dappuiin, man man zawka an hralh theih dan zawnpui tum a ni,” PC Vanlalruata hian a ti.