Mizoramah kuhva chinga eizawnna chu eizawnna tha tak a ni chho a, kuhva chingtuten a hlawkna an tel chho ve tan mek a. Hetih lai hian khawchhak lam atanga dan kalha kuhva lo lut chuan Mizoram chhunga kuhva tharchhuah a rawn tibuai a, dan chhunga awm mek Mizoram kuhva leh dan kalha lo lut kuhva ro chu tunah hian Mizoram chhungah an indo mek a.
Thil mak tak chu, kuhva ro lo lut hi dan kalh a ni a, drug anga khawi lai bag mawng emaw, sahbawn bawm ruak emawa thuhruk tit tet theih a ni ve lo a, truck lianpui puia phurh lûk lûk ngai a ni. Chuti chung chuan Mizoram sawrkar hian a lo dang zo lo a, a man rem thei lova, a ram leilung fate eizawnna a rawn bawhbet a, kum tam tak chhung he dan kalh Kuhva hian dan chhunga awm mek kuhvate hi a bawhbet thei tlat mai a; hei hi a ni ‘thil mak’ chu!
Dan kalha ram dang atanga kuhva a lo luh theih chhan hi, a ram leilung fate zingah lo thurualpui an awm vang pawh lo ni ta se, dan kalha lo lut a ni a, man theih a ni tih tlang hriat a ni a, a sawrkar ber pawhin chu chu a puangzar chamchi a; mahse, tun thleng hian kuhva chingtuten duty-a lo ven ngai khawpin state chhung kawngpui dung hi an la zawh tluk tluk thei a; hei hi han ngaihtuah chian hian a mak tulh tulh mai a ni.
Sawrkar kal tawhten hei hi an chingfel thei lova, sawrkar tharah beiseina sang tak a awm a. Sawrkar thar pawhin thla ruk zen zawn chu kuhva buaipuina hun a nei tawh; thua sawi leh a taka tih hi chu a lo inthlau deuh ni ngei tur a ni. A kuhva ro nuai bo aiin, zalen taka mahni ram chhunga chin leh tharchhuah mek Kuhva te chuan ‘certifying officer’ te an paltlang a ngai ta hlauh zawk em maw ni! A ram leilung fate zalenna rawn tibawrhbang thei khawpa kuhva ro kan la dah thei hi thil mak tak a ni.
A nihna takah chuan, min rawn run mektu kuhva ro hian che thei lovin min siam ta hlauh zawk tihna a ni. Tunhma zawng zawnga zalen, engthawl leh awlsam taka Mizoram tharchhuah kuhvate state pawna hralh zung zung theih ni thin kha, Kuhva ro avanga ‘certifying’ a lo ngai ta hial hi, kuhva ro lakah hian kan tlawm ta mai tihna em ni? Engatinge Kuhva ro hi titawp lova, keimahni harsatna kan insiam belh tak mai? A chin hriat theih loh leh hmuh theih loh pawh ni lo Kuhva ro hi engatinge sawrkar meuh pawhin state chhunga a la vir kualtir reng theih le?
Kuhva indonaah ‘thil mak’
Get real time updates directly on you device, subscribe now.
Next Post