Sabalenka leh Rybakina an tla!

Sabalenka leh Rybakina an tla!
Nilaini French Open hmeichhe singles quarter-final match pahnihah beisei loh result hmuh tur awmin, second seed Aryna Sabalenka leh fourth seed Elena Rybakina-te chuan last four an thleng zo ta lo!
A match khelh chhung zawnga damsam lo Sabalenka hi 6-7(5), 6-4, 6-4-in Russian tleirawl Mirra Andreeva chuan a hnawtchhuak a, grand slam match 11 chak zawn mek Australian Open champion chak tluang lai chu Court Philippe Chatrier-ah a tawp ta rih a ni.
Kum 26-a upa Belarusian barakhaihtu Andreeva tan tun hi major semi-final a thlen vawikhatna niin, kum 1997-a kan hmuh Martina Hingis hnu lama Grand Slam last four lut thei naupangber a ni a, final luh inchuh match pakhat zawkah Rybakina barakhaih ve thotu Jasmine Paolini a hmachhawn ang.
Huaisen taka world number two hmachhawn ngam Andreeva hian Roland Garros mipui ngaihven a hlawh nghal hle a, beisei loh hnehna a chan hnuah a coach Conchita Martinez vanga chak a nih thu sawiin, a coach kaihhruai dan zawm chu a khirhkhan hle tih a tarlang tel.
Andreeva chuan reporter rual hnenah, “Khel tura min duh dan ka zawm ve hram hram zel a, he match atan pawh hian ka coach nen ruahmanna felfai tak kan siam a, mahse, kan han khelh tak tak kha chuan ka theihnghilh fai leh vek a, han inkhelh tak tak chuan ruahmanna kan lo siam ve pawh ka thluak hian a ngaihtuah thei lo a ni ber a, chuvangin, ka theihna vawrtawp nen ka khelh duhdan anga khelh pawp mai loh chu kan ruahmanna lo siam ve tawh zawm ka harsat a, keima khelh khelha ka khelh hian a kal dik ve tlat,” tiin plan siamlawk anga khelhchhuah harsa a tih thu a sawi.
Russian hian a tir lamah nervous deuh mah se a rei telh telh a, a inringtawk ve tulh tulh tih tarlang telin, “Ka tumpui kha tawnhriat ngah tawhte a lo ni a, Grand Slam title pahnih la tawh player ropui, bawh na lutuk a nih miau avangin a tirah kha chuan ka hneh theih pawh kha ka inring chiah lo a, mahse, a boruak kha nuamti taka chen chunga ka theihtawpa thaa khelh mai kha ka tum ta a ni,” tiin Sabalenka a hmachhawn tir lam boruak a sawichhuak.
Belarusian Sabalenka thung chuan chhuanlam a nei a, Paris a thlen hnuah pum nuam loin a tibuai tih sawiin, chu chu kum 2015-a ropui Serena Williams hnu lama hmeichhe zinga season khata Australian Open leh French Open title lakawp leh thei hmasaber nih a tumna kawng pawh a dal ta chiah niin a sawi.
Nilaini quarter-final inkhel dangah Russian ni chunga piang, a hnu lama Kazakh ni zui ta Elena Rybakina pawh rinkai zawk ni chungin Italy player hriat hlawh lo Paolini chuan 6-2 4-6 6-4-in a vawtla ringawt bawk!
Dubai champion Paolini chuan chuan a tum leh tur Andreeva pawh chona lian a nih thu sawiin, “Madrid-ah khan kan intawng tawh a, player ropui a ni chiang mai.A la naupang nain rilru lamah pawh a paukhauh a, a defending a tha a, a serve pawh a tha tel lehzel a, tuntum kan inkhel tur pawh hi a hautak leh dawn a, mahse, semi-final chinah tawh hi chuan match awlsam a awm tak tak ngai lo,” tiin boruak a thlirlawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More