Kuhva phur vengtu in chhiat an tawk

July 11 zan khan Mamit district-a Tuidam khaw bulah dan loa kuhva rah tawlhruk phurh vengtu car chuan chhiat a tawk a, a chhe nual nia sawi a ni.
Thudawn danin, Thawhlehni zan dar 11.00 vel khan Tuidam khaw hnuai, Tumpanglui kawngah Myanmar atanga lakluh kuhva ro phurtu truck man a ni a, bag 41 an phur. Kuhva ro phurtu hi tipper, balu phur thin a ni a, a khalhtu hi Mamit district Bawngva khua a ni.
Kuhva phurtute hian an hmaah an kawng ensaktu (escort) an nei niin an sawi a. A mantute hian chhuanlam siama kolet turin an ti a, Tripura chhung an luh tawh hnu ah an rawn tlanlet a, a khalhtu bakah Kanhmun mi nia insawi hmeichhe pahnih leh Aizawl lam mi nia sawi mipa pakhat an chuang. An rawn let leh hnu hian chhiat an tawk a, a chuangte rawh an na lo. Kuhva phurtu truck pawh hian chhiat a tawk lo nia sawi a ni.
Kuhva phurtu truck leh a vengtu car hi Kanhmun Police kuta hlan an ni tih thudawnna chuan a sawi a. Tumpanglui hi Tuidam atanga Tripura panna niin, tunlaia lirthei tlan an endikna thin, Zamuang Police Check Post paltlang a ngai lo nia sawi a ni.