Kuhva rah phur lui tawh lo turin HBKCP-in ngen

Mamit district magistrate-in an huamchhungah dan loa kuhva rah phur lut tawh lo tura hriattirna a tihchhuah tawh hnu pawha a phur lut an la awm reng thinte chu tilui tawh lo turin Hachhek Bial Kuhva Chingtu Pawl chuan a ngen nawn.
Hachhek Bial Kuhva Chingtu Pawl hian June 18 zing dar 1.00 – 2.00 inkar khan Mamit district Kawrthah leh Rengdil inkarah kuhva chinga eizawngtu mipuiin dan loa kuhva tawlhruk, truck lian trip hnih an man a. Kuhvah ro an man hi quintal 144 vel nia chhut a ni. A phurtu truck MZ 01U 9525 khalhtu Laldanmawia, Tuikual ‘S’ nia sawi hian kuhva hi Champhai lam atanga lokal, Truck Terminal-a dah, a driver a theih zui tak loh avanga inhlawha a khalh chhawk ta niin a insawi.
Truck dang MZ 05 4017 neitu leh khalhtu hi Vanlalnghaka, Bawngkawn Hmar Veng nia insawi a ni. Driver pahnih hian dan phal loh kuhva phura khawthlang lama an kal vawi khatna ve ve niin an sawi.
Heng truck pahnih vilvengtu, Wagon R car MZ 01K 4332 khalhtu Lalmuanawma, Luimawi pawh an man a. A ni hi tunhnai lawka BSF-in kuhva an mansak leh an manna kudam neitu, tuna truck pakhat zawkin a phurh pawh hi ama kudama dah tur nia sawi a ni tih HBKCP hian an sawi a. Police kuta hlan an nih hnu ah Champhai lam atanga rawn kal a nih avangin Custom lamah pek zui a ni tih an sawi.
Dan phal loh kuhva phurh phal loh chungchangah hian Mamit district bawrhsap hriattirna dinglai awm reng chung a, tun thlenga Hachhek bial chhunga phurhluh a la ni reng leh a kalkawnga an la hmang talh an duh loin an haw takzet tih HBKCP hian sawiin, tun hnuah mi tumah tilui tawh lo turin a ngen nawn a. Ngenna ngaipawimawh loa tilui an awm a, harsatna an tawk a nih pawhin, an cho chhuahah an ngai dawn tih a sawi. Sawrkar hnathawk emaw mimal pawh hetianga inhnamhnawih hriatchhuahte chu a na thei ang bera an chunga action lak a nih theihna’n thuneitu sang zawka thlenin hma an la zel dawn tih HBKCP hian a sawi bawk.