PUC-in zirlai kalchhuak turte thlah

Pachhunga University College chuan an zirlai kalchhuak turte thlahna, Grad dinner vawi 16-na chu Inrinni khan an hmang.
He hun hmanpuitu Mizoram University vice chancellor Prof. Dibakar Chandra Deka chuan zirlaite chu eng dinhmunah pawh ding se, an zirchhuahna college hi theihnghilh loa hrereng thin turin a chah. “Tunah chuan khawvel pum hi in tana zuan luh theihin a inhawng a, in zuanglut dawn. In lo hlawhtling viauin khawvel ram changkang tak takah in kal pawh a ni thei, mahni rama iIn lo let duh lo a ni pawhin theihnghilh suh u. MZU, PUC, in society, in chhungkua theihnghilh suh ang che u,” a ti.
Zirlai exam result nghak mekte chu an zavaia pass vek tura a duhsak thu sawiin, Mizoram mai ni lo India ram chhunga college tha ber pawla an zir thei te, campus zau tak leh changtlung tak an neite chu a lawmpui thu a sawi a. Graduate an nih hnuin zinkawng hmabak tam tak an la nei tih sawiin, taima taka zir zel turin a chah.
PU College hian kum 2006 atangin an zirlai chhuak turte tan zir chhuah chawhlui – Grad Dinner an buatsaih thin a. Covid 19 leng vangin 2020 leh 2021 ah an buatsaih thei loa, kumin hi a vawi 16-na niin, tun tumah hian zirlai chhuak tur 1035 thlah an ni.