Kuhva ro tawlh chungchangah High Court-in sawrkar a nawr

Dan loa Mizoram kaltlanga kuhva ro tawlh chungchang chhuichianga hma la turin court-a ngenna thehluhah High Court chuan an thuchhuak bawhzui kawngah state sawrkar a chemuang hle tih a sawi a, chief secretary chu hei hi amah ngeiin sawifiah turin a hrilh.
Kum 2021 khan social activist Vanramchhuangi’n kuhva ro tawlhruk tihtawp tum hian Mizoram sawrkarin hma a la tawk lo nia hria in leh, heng kuhva phurtute hian a concerned department atangin e-way bill dik lo nei thei anga hriat a nih avangin Public Interest Litigation (PIL) a thehlut, thu kal zelah Gauhati High Court Division Bench chief justice Justice Vijay Bishnoi leh judge Justice Michael Zothankhuma thutna chuan kumin May 17 khan a ngaihtuah leh a ni.
He court-in kum January 22-a a lo ngaihtuah tawhnaah, e-way bill inpek danah hian thil hnawk deuh awma a lan bakah PIL thehluttu FIR chu ziahluh a nih loh thu te, hemi chungchangah hian FIR thar ziahluh pawh a theih tho thu leh, court-in bawhzui tul a tihte bawhzui a ni lo chu a lungawi thlak loh tih court hian a sawi a ni.
Case investigating officer-in a hmain chief judicial magistrate (CJM) Champhaiah chhui phalna a dil chu CJM hian a lo hnawlsak tawh a; High Court-in January 22-a he case bawhzui tura a tih hnu ah pawh Champhai Police Station officer -in- charge chuan tih takzetin hma a la zui lo nia a ngaih thu court hian a sawi bawk.
Heng thil avang hian Champhai Police OC chu insawifiah turin a ti a. Chief secretary chu state sawrkarin hma a lak chak loh chhan sawifiah turin High Court hian a ti a. Kar thum hnu ah ngaihtuah leh turin thu a dah a ni.