Kuki pawngsual rawn thi ta tan dikna hlen chhuah phut
Kuki pawngsual rawn thi ta tan dikna hlen chhuah phut
Pawl hrang hrangin kum 2023-a chi leh chi inkara buaina a chhuah tirh lama Manipur-a Kuki hmeichhia, pawngsual rawn a nih hnua hlauhna leh damlohna dangin a bawh buai zui hnua thi ta tan dikna hlen chhuah a nih ngei an phut nasa hle.
Manipur-a Churachandpur leh Delhi-a Kuki pawlte chuan he hmeichhia hi May, 2023 khan Imphal atangin ruk bova pawngsual rawn niin an sawi a. A tlan chhuah hnuah a hliam tawrh leh a thil tawnin a barakhaih em avanga dam tak tak ni nei tawh lovin January 10 khan Guwahati, Assam-a an enkawlna hmunah a thi a ni.
Heng pawlte hian Kuki tan inrelbawlhna hran neih an phut bawk a, Meitei-te nen chuan an khawsaho tak tak thei ngai dawn lo niin an sawi.
May, 2023 atanga Imphal-a cheng Meitei leh tlangram district-a cheng Kuki-te inkara buaina chhuak avang hian mi 260 vel an thi tawh a, mi sang tel in leh lo tlanchhiatsanin an awm mek a. Nikum February thla atang khan President’s Rule hnuaiah an awm mek bawk.
Kuki pawl, Indigenous Tribal Leaders Forum (ITLF) chuan, “He thihna hian Kuki-Zo hnam tawrhna rawng tak chu chiang takin a tar lang thar leh a ni,” an ti.
Kuki-Zo hian duhthlan tur dang tunah chuan an nei tawh lo va, ‘an him nan, an chanvo an chan theih nan leh an dam khaw chhuah nan’ inawpna hran neih chauh a nih thu ITLF chuan an sawi a, an pawl hian Inrinni zan khan Churachandpur-ah hmeichhe thi ta thlahna hun an hmang bawk.
Kuki Students’ Organisation (KSO), Delhi & NCR pawhin dan bawhchhiatna leh mipui telna pawl tam takin an phut chunga a titute man chhuak tura hma lakna awm lo chu pawi an tih thu an sawi.
“He thihna hi kum 2023-a a laka tharum thawhna thleng avang liau liau a niah kan ngai a. A mawhphurtu leh inhnamhnawihte chu man chhuaka atan dikna hlen chhuah ngei kan phut a ni,” an ti.
An pawl hian sorkar laipui chu tribal-te tan inawpna hran a awm theih nana pen chhuak tura ngenin, ‘thil tul leh tih loh theih loh a ni’ an ti.
Kuki hmeichhe pawlte pawhin hmeichhe thi ta chu a laka dikna hlen chhuah loh leh a tawrhna avang chauhva hriat reng hlawh tur ni lovin, rawng taka tihna a tuar chunga huaisen taka awma a beih letna chu an hriat reng tur thu an sawi.
“Kum thum chhung zet tute mahin an tawrh zawh loh tur na a tuar a ni,” tiin Kuki-Zo Women’s Forum, Delhi & NCR chuan thu an chhuah.