Kuki-Zo Council-in NH-2 an dan an hawng dawn ta

Kuki-Zo Council-in NH-2 an dan an hawng dawn ta
Buaina awm mekna, Manipur-ah boruak muanawm a awm theih nan tiin Kuki-Zo Council chuan an state leh Nagaland leh hmarchhak hmun dang inkalpawhna kawngpui pawimawh tak, National Highway-2 (NH-2) an dan chu an phelh dawn tih an puang.
Kawngpui dan an tihtawp tur hi Prime Minister Narendra Modi-a’n an state a tlawh dawn tih sawi a awm hnu lawka an puan a ni.
New Delhi-a Ministry of Home Affairs (MHA) aiawh leh Kuki-Zo Council hi vawi eng emaw zat an indawr hnuah kawngpui danin thil kal vel nasa taka a tihbuai avanga hawng tura an ngen angin hawn turin an ti ta a ni.
Ningania MHA-in thuchhuah a siamah Kuki-Zo Council hian sorkar laipui hnuaia venhim hna thawktute chu NH-2 paltlanga veivak leh ni tin mamawh phurte zalen taka an chet theih nan thawhpui an intiam tih tar lan a ni.
“Kuki-Zo Council hi sorkar laipuiin NH-2-a venhim hna thawktu a dahte tha taka thawhpui turin an inruahman a ni,” tiin ministry chuan a tar lang.
Kawngpui hi May, 2023-a Manipur-a Meitei leh Kuki-Zo inkara buaina chhuak, mi 260 vel thi tawhna leh mi sang tel baihvaia an awm phahna a thlen hnu atangin dan a ni a. NH-2 hawn hi thuneitute leh mipui aiawhten vawi tam an sawiho tawh a, an state-a botuak tha a awm leh theihna tura thil pawimawh tak nia ngaih a ni.
Kawngpui hawn hi chhawmdawl hna thawktu pawl leh mi cheng, a bik takin relief camp-a la khawsa mekten an mamawh an neih zung zung theih nana pawimawh a ni a. Khar a nih kha chuan ni tin mamawh bakah ei tur, damdawi leh tuialhtheite chu khamkhawp hmuh tur a awm thei lo a ni.
Sorkar laipui chuan MHA, Manipur state sorkar leh Kuki National Organisation (KNO) leh United People’s Front (UPF) aiawhte nena inbiakna a ruahman bawk a. He inbiaknaah hian Suspension of Operations (SoO) Agreement siam thar lehin hei hi kum khat chhung hman tura tih a ni.
Inremna siam thar leh hian tum pahnih – Manipur inpumkhatna vawn nun leh indawra chi leh chi inkara buaina awm chu a muanawm thei anga a chin fel dan zawn tih a nei.
SoO inremna thar ang chuan KNO leh UPF chuan an camp pasarih chu buaina chhuahna hnaih atangin an sawn ang a, hetiang camp hi an titlem bawk ang a, an ralthuamte chu an hnaiha awm Central Reserve Police Force (CRPF) leh Border Security Force (BSF) hmunah an dah dawn a ni.
Inremna ang chuan heng pawl pahniha mite hi venhim hna thawktuten uluk taka endikin ram dang mi an camp-ah an awm em tih pawh an chian vek dawn.
“Joint Monitoring Group-in khauh takin thil thlengte an thunun ang a. Inremna bawhchhiate lakah na taka hm lain a tul chuan SoO inremna ennawn thlengin tih a ni ang,” tiin MHA chuan a tar lang.
Kum hnih chuang chi leh chi inkara buaina a chhuah tawh hnuah Manipur hi Prime Minister Modi-a’n a tlawh dawn tih sawi a awm mek a, finfiahna tak erawh a la awm chiah lo va, a tlawh ngei erawh rin a ni.