Kulikawn Hospital tilian dawn

Health department enkawl Kulikawn Hospital chu sawrkarin tihlen a tum a. Inrinni khan chief minister Lalduhoma hoin a hmunhma enfiah a ni.
Chief minister chuan Aizawl South-II bialtu MLA Pu Lalchhuanthanga’n term hmasa atang tawhin he Hospital hi a vei em em a, Assembly House-ah hial a auchhuahpui thin a, sawrkar lai nih loh chuan hmalak vak ngaihna a awm si lo a. Pathianin sawrkarna min pe ve ta a, bialtu MLA bawkin ngaipawimawhin vawi tam a rawn thlen tawh tih a sawi a ni.
Aizawl Civil Hospital-in mipui min dawl zo meuh tawh loa, he hospital tih len hi Civil Hospital tih lenna atana pawimawh tak a nih bakah Psychiatry Hospital kan neihchhun a ni a, sawrkar sum neih tlem hle mah se, an sawiho hnu ah an la neihchhun angte Kulikawn Hospital tih len nan hian bawk nawlh mai ang, tiin, cheng vaibelchhe 67 an dah tih a sawi a ni.
Hnathawh kawngah building sak a nih hunah pawh monitoring lamin ngun takin an vil reng dawn a, khawtlang hruaitute leh NGO lam pawhin hospital tha tak kan neih theih nan kan thawh ho a ngai dawn tih chief minister hian a sawi.
Khum 100 awm theihna tura duan Kulikawn Hospital Complex thar hi Ministry of DoNER scheme NESIDS sum vaibelchhe 67.63 hmanga thawh tum a ni.