Kum 13-15 inkar zuk leh hmuam ti 58%

National Tobacco Control Programme (NTCP), Mizoram chuan, Mizoramah naupang kum 13 leh 15 inkar zuk leh hmuam ti zaa 58 an awm tih an tarlang a. April 2024 atanga March 2025 chhung khan NTCP chuan Mizoram chhunga zirna in hrang hrangah vawi 291, NGO leh kohhran hrang hrangah vawi 62 awareness campaign an nei a, training vawi 40 an huaihawt a. He kum khat chhung hian puipunna hmuna meizu 444 man a ni bawk.
Vaihlo khapna dan COTPA (Cigarettes and Other Tobacco Products Act, 2003) hnuaia Section 6 (a)-ah chuan, kum tling lo (kum 18 chin hnuai lam) hnena vaihlo leh a kaihhnawih chi reng reng hralh khap tlat a ni a; Section 6(b)-ah thung chuan, zirna in hual vel yard za bial chhungah vaihlo leh a kaihhnawih lam chi reng reng zawrh khap tlat a ni bawk.
Vaihlo khapna dan tha tak kan nei chung leh, NTCP lamin ni tin deuhthaw zirna in hrang hranga awareness campaign an nei chung pawhin, kum tling lo, kum 13-15 inkarah vaihlo leh a kaihhnawih khawih/tih ching heti zat an awm thei hian, vaihlo khapna dan COTPA kenkawh kawngah tan lak thar leh a tulzia a tarlang chiang hle awm e.
Vaihlo kan chhiatpui dan chu sawi ngai lova kan hriat tlan a ni a. Chuvangin, kum tling lo hnena vaihlo leh a kaihhnawih hralhtu dawrkaite chunga khauh zawka dan kenkawh a pawimawh dawn hle a. COTPA Section 6(b) kenkawh kawngah pawh hian, tun aia khauh zawka kalpui a hun tawh hle niin a lang. Section 6(b) hi hmun tam takah chuan khauh taka kalpui mek a ni a, sikul awmna atanga yard za bial hriat nan rawng ênga rin kual te pawh an awm tawh.
Aizawl khawpuiah hian, school uniform ha chunga kawngsira zial lo pak khu hlat hlat thin zirlai hi hmuh tur an awm zut tawh a, thingtlang khaw lam dinhmun hi eng tak ni ve ang maw!
Zirlai uniform ha chunga khawlaia zial zu pat pat ngam an awm tawh chuan, zial zuk ringawt kha ni tawh lovin, kha zirlai khan discipline a tlachham tawh hle tihna a ni. Khawlaiah ualau taka zirlai tih hriat takin zial a zuk ngam tawh chuan, aia upa zahna pawh a nei tawh lo tihna a ni nghal bawk a, an chawr chhuahna school tan hmingchhiatna a ni tel nghal bawk.
Hemi chungchangah hian, zirna in (institution) atanga hmalak dan a awm rualin, zirna in bula vaihlo leh a kaihnawih zawrh khapna dan kenkawh kawngah pawh khawtlang sawrkar (local council) leh NTCP tangkawpa hmalak dan a awm nghal bawk. Hetiang zawnga hma lak a nih loh chuan ‘awareness campaign’ ringawt hi chu kan khawpkham tawh lo a nih hmel. |anrualna bawk a pawimawh.