Kum 20 hnua Aizawl dinhmun thlirho

Kum 20 liam hnua Aizawl khawpuia awm dan tur thlirlawkin, khawpui chenna tlak leh him a nih zel theihna lam sawihona – national symposium chu Thawhtanni khan Govt Aizawl College Mualpuiah neih a ni. Aizawl Smart City Ltd. bultum he symposium hi UD&PA minister K Sapdanga’n a hmanpui. Aizawl khawpui hi khawpui naupang tak a la ni a, kawng hrang hrangah hmasawnna tur a tam hle a, a pawimawh ber chu mitinin kan rilru puthmangah hma kan sawn a ngai tih UD&PA minister hian a sawi.
“Kan rilru put hmang leh awm danin kum 20 hnua Aizawl khawpui awm dan tur a hril thui dawn a, vawiina college zirlaite hian in fate tan Aizawl khawpui hi chenna tlak leh him a ni dawn em, tih ngaihtuah nachang in hriat a, in hmazawn theuhah theihtawp in chhuah a, hma in lak a tul a ni,” a ti.
Aizawl Smart City Ltd. chief executive officer CC Lalchhuangkima chuan tun atanga kum 20 lo awm tura Aizawl khawpuiin harsatna a tawh theih tur hrang hrang a sawi a. Chutiang harsatna pumpelh dan tur emaw a sutkian dan tur emaw chu UD&PA, AMC leh MZU lama mithiamten technical session-ah an sawi a ni.
Thawhtanni zan khan technical session thumna chu online-a neih a ni bawk.