Kum 2022-2023 GST ah Cheng vbch.1020 hmu pha

Kum 2022-2023 GST ah
Cheng vbch.1020 hmu pha
Kum 2022- 2023 khan Goods & Service Tax atangin Mizoramin cheng vaibelchhia 1020.66 a hmu a, budget-in chhiah khawn tura a bituk sa aiin a tam daih tih Taxation minister Lalchamliana chuan a sawi.
Ningania Siaha-a Deputy Commissioner of State Tax office building thar a hawnnaah Taxation minister hian, 2017 July 1 atanga Goods & Service Tax (GST) hman a nih khan nasa takin Mizoramin chhiah a khawn pawh a pung tih a sawi a. Kum 2017- 2018 khan GST ah cheng vaibelchhia 424.91 hmuh niin 2022- 2033 khan vbch. 1020.66 khawnchhuah leh niin, budget-in chhiah khawn tur a tih chu a khum tih a sawi a ni.
Tax petu leh rim taka a khawn hna thawktute chungah minister chuan lawmthu sawiin, “Sawrkarin chhiah a hmuh hi mipui tan hman leh thin a ni a. Buhfai, tui leh kawlphetha tlawm zawkin mipuiin an lei theih phah thin a, hei vang hian chhiah pek leh a khawn kawngah inthlahdah theih a ni lo,” a ti. State intodelhna turin chhiah pek leh khawn that a pawimawh, tiin, sawrkar pawhin theihtawp a chhuah mek zel tih a sawi.
District Council leh UT hun lai khan Taxation department ngaihpawimawhna a hniam hle tih Lalchamliana hian a sawi a. 1988 May 20-a Excise leh Taxation department a hranga dah a nih khan chhiah khawn lamah hmasawnna hmuh tur a awm tan tih a sawi bawk.
Deputy Commissioner of State Tax office building Siaha sakna atan hian SPA (Plan) hnuaiah cheng nuai 408.37 hmuh a ni a; contractor atan Malsawmtluanga, Chaltlang Aizawl thlan a ni.