Kum 2024-ah lirthei chesualah mi 1,77,177 thi, a pung

Kum 2024 chhungin kawngpuia lirthei chesual avanga thi mi 1,77,177 an awm a, a hma kum aiin an tam zawk.
Parliament thlasik thutkhawm neih mekah hei hi tar lan niin kum 2023-ah mi 1,72,890 thiin 2.5%-in a pung a, kum 2024 chhung hian ni tin mi 485 vel lirthei chesuala thi ziah ang an ni.
Central Road Research Institute (CRRI)-a chief scientist leh traffic engineering & safety division head S Velmurugan chuan India-a kawngpuia lirthei chesuala thi pung ang bawk hian khawvel pumah hmar lam ramah tun hnaiah a pung nasa niin a sawi.
“Hetiang zat thi an awm hi thil mak tak a ni lem lo, kum 1990 chho tawp lama ram changkang tam taka thleng ang zat bi kha India-ah hian a la thleng pha lo zawk a. A tam lai ber an thlen hnuah a ding a, a hnuah tlahniam leh vek an ni a. India-ah hian lirthei neitu an pung nasa em em a, kawngpui chak taka siam a ni bawk a; mahse, a himna lam hi hemi kawnga thanna nen hian a inmil lo si a ni,” a ti.
“Ni tin national higway km 40 sial thar ziah ang kan ni a, hetih lai hian himna tura thiltih erawh ziaka awm, a tak taka la thleng si lo leh mi tam zawk la thleng phak lo a ni mek rih a ni,” a ti.
Velmurugan-a chuan lirthei tlan chak leh kawngpui siam dan hmang tha tawk lo chu India-a chet sualna tam chhan lian tak a nih thu leh hei hi en fiah a ngaih thu a sawi a. Kawngpui lian tam takah mihring kalna tur pawh siam a ni lo va, hei hi chetsualna leh thihna thlen chhan lian niin a sawi.
Kum 2024 chhunga ram chhunga lirthei chesual avanga thi zat hi Union Road Transport Minister Nitin Gadkari-a’n Dravida Munnetra Kazhagam (DMK) MP A Raja zawhna ziaka a chhannaah a tar lang.
Gadkari-a chuan February, 2020-a Global Ministerial Conference on Road Safety vawi thumnaah Stockholm Declaration on Road Safety pawmin kum 2030-ah kawngpuia chetsualnaa thihna leh hliam tuar zat chu 50%-a tihhniam tum a ni tih a tar lang a, India pawh hemi pawmtu zingah hian a tel tih a sawi.
India-ah hian mi nuai khat zelah mi 11.89 thi ang an nih laiin China-ah chuan 4.3 a ni a, US-ah pawh 12.76 a ni tih World Road Statistics, 2024-ah tar lan a ni tih a sawi.
Zawhna dang a chhannaah Gadkari-a chuan lirthei chesuala hliam tuar mi 5,480 chu Cashless Treatment for Road Accident Victims Scheme, 2025 hnuaia Motor Vehicle Accident Fund hmanga enkawlna dawng thei niin pawisa pek ngai lovin inenkawl an dawng niin a sawi a. He scheme hi state leh union territory 36-a damdawi in 32,557-ah hman a ni tih a sawi bawk.