Kum 2025-ah TB kai hmuh chhuah atangin zaa 84 dam

Kum 2025 chhung khan Mizoramah Tuberculosis (TB) kai hmuhchhuah 2275 an awm a, heng zinga zaa 84 chu tihdam an ni. March 24 kha ‘World TB Day’ a ni a, Mizoramah pawh district hrang hrangah hman niin, Aizawlah chuan District TB Centre huaihawta hman a ni a. Hmanpuitu National Health Mission Mizoram mission director Dr R Lalchhuanawma chuan, kumin World TB Day thupui chu “Mipui chakna ringa TB natna umbo” tih a nih angin, thawktute, ram hruaitute, vantlang roreltute leh mipui kan zavaia TB do kawngah kan thawh theuh chuan TB kan umbo thei ngei dawn tih a sawi a ni.
TB programme hnuaiah thawktuten mipui kawtkaiah kalchilhin a thlawnin TB test-na leh a damdawi ruahman a ni a, TB veiten an inenkawl chhunga ei tur tha an ei theihnan tanpuina thla tin Rs. 1000 an dawng thei tih a sawi. Sawrkar laipuiin a ngaihpawimawh em em pakhat chu mipui atanga TB vei chaw tha hmanga tanpuina pek a ni, tiin, village council-te chu an khuaah TB vei an awm chuan sawrkar laipuiin phut angin chaw tha hmanga lo tanpui thin turin a chah.
“TB test hi mitinin kan ngaihpawimawh a, a natna hmuhchhuah thuai a, enkawl ran hi kan hneh theihna a ni tih hriain TB umbo tura tangrual turin a sawm a ni,” a ti.
Video kaltlangin Health minister Lalrinpuii chuan TB Day pual thuchah a sawi a. Sawrkar departments, kohhran leh khawtlang thawhhona vangin TB awmlohna khua – ‘TB free village’ engemawzat an nei chu lawmawm a tih thu a sawi a. TB do turin tanrual a pawimawh tiin, TB vei inringhlelh chu test thuai a, a natna hmuhchhuaha enkawl chu he natna darh zel tur venna pawimawh a ni tih a sawi a ni.
TB umbo tura sawrkar laipui ruahman – TB Mukt Bharat Abhiyaan hnuaiah thawktute vak chhuakin TB vei dap thin an ni a. Khaw tinah TB vei awlsam bikte chu ngaihpawimawh niin list chhuah vek an ni. A thlawnin thawktuten screening an neihsak a, mihring awmkhawm tamna hmun leh TB inkaidarh awlsamna – jail, home adt. ah a zing thei ang berin endik a ni bawk.
8 Kum 2025 khan Aizawl district-ah TB vei 1495 hmuhchhuah an ni a, TB damdawi ei tluantling loh avanga damdawi sang zawk mamawh tawh (MDR- TB) mi 135 hmuhchhuah niin, TB leh HIV vei kawp 118 hmuhchhuah an ni. Thi 55 (7%) an awm a, tih dam 78.41% an ni.
8 Kum 2025 khan Mizoram pumah TB vei 2275 hmuhchhuah an ni a; MDR- TB nei tawh 146 hmuhchhuah niin, TB leh HIV vei kawp 267 hmuhchhuah an ni. TB vanga thi 145 an awm a, a vei hmuhchhuah zawng zawng atanga tihdam hi zaah 84 an ni.
8 TB awmlohna khua ni tura inelna thianghlim – ‘TB Free Village’ tih kalpui a ni a. Kum 2025 khan Mizoramah TB awmlohna khuaa puan theih khaw 150 an awm a, heng zinga khaw 74 chu kum khat TB Free village ni thei, khaw 58 chu kum hnih azawna TB Free Village ni thei, khaw 18 chu kum thum chhung TB Free Village ni thei an ni.
8 Aizawl district-ah TB Free Village ni thei khaw 19 – Lamchhip, N.Lungleng, Samtlang, Tawizo, Dilkhan, Thanglailung, Maite, Lenchim, Khanpui, Kepran, Sunhluchhip, Chhanchhuahna, Lamherh, Vanbawng, New Vervek, N Khawdungsei, Khawpuar, Upper Sakawrdai, Hmunnghak an awm a. Kum hnih chhung TB Free Village ni zawn thei 4 – Lamchhip, N. Lungleng, Samtlang leh Khanpui an awm.
8 TB veite hnena nitina chaw tha an ei theihna tura tanpuina petu pali hnenah Nikshay Mitra award hlan a ni a. SEL Foundation, Mizoram Synod, Dr B Lalthantluanga leh Kuriz Collection an ni.