Kum 40 chhunga sawrkar sum puk zat kha an puk hman dawn – MPCC

Kum 40 chhunga sawrkar sum puk zat kha an puk hman dawn
– MPCC
ZPM sawrkar chuan kum 40 chhunga sawrkar tawhten sum an puk zat kum 5 chhunga puk hman thei dinhmunah an ding mek tih Congress party chuan an sawi.
MPCC Media department chairman Lalremruata Renthlei chuan, chief minister leh minister thenkhatin budget chungchang dikhlel deuhin an sawi fo tih a sawi a. Thudik hmanga ram kaihruai ve tawh turin an ngen tih a sawi.
RTI zawhna Finance departmenrt chhan danin, ZPM sawrkar hian December 2023 atanga June 2025 thleng khan cheng vaibelchhe 6214.27 an puk tawh a, chawhrualin kum khatah vbch.3000 chuang an puk tihna a ni tih a sawi.
“Hei hian ZPM sawrkar hnua leibat tak tak chu vbch. 500 an tih hi dawt chiang tak a ni tih a tichiang. CAG-in Mizoram sawrkar sum dinhmun, unaudited provisional figure thla tin a tarlan thinah kum 2024- 2025 chhung khan vbch. 3133.45 an puk a, budget-a puk an tum zat an sawi chu vbch 1365.70 niin, an puk tamna hi 229.44% a tling. 2025- 2026 budget-ah hian vbch. 1651.68 puk turin an inruahman a, June thlenga CAG report tichhuahah vbch. 1178.53 an puk tawh a, thla thum chhungin an puk tum zat atangin 71.35% an puk tawh,” a ti.
Tuna Mizoram leiba chu 2024- 2025 budget-a a lan danin vbch. 14034.76 a ni a, hetiang zela an puk chuan kum 40 lo sawrkar tawhten kum 40 chhunga an bat aiin ZPM sawrkarin kum 5 chhunga an puk chu a tam thei dawn tihna a ni tih Remruata Renthlei hian a sawi.
Sawrkar leiba an rulh zel avangin leibat tak chu a tlem nia ZPM sawrkar hotuten an sawi thin pawh, sum puk thenkhat chu a pung nena a kum leha rulh nghal ngai, thenkhat chu kum 10 hnu-ah a pung mai bakah a capital nena sawrkar lo awm turten an rulh ngai a ni tih a sawi.
“An rulh lehnghalna tur sum an puk thenkhat, NABAARD atanga sum puk hi a tam loa, mipui hmaa dawt hmanga insawithiam tumna a ni. Sawrkar sum puk hi hunbi neia rulh tur a ni a, rulh dan pawh RBI-in Mizoram sawrkar account atangin a lo cut thin a, a hrana rulh a ngai hran lo. ZPM sawrkar hi hemi kawngah hian an vannei em em zawk a. Kum 10 kaltaa Congress sawrkarin Year of Consolidation a puan hlawhtlin em em zar kha an zo a, sum an puk tlem leh budget surplus hial an lo neih kha a nghawng a lo lang a, sum puk sa rulh tur an neih tam loh phah hle,” a ti.