Kum 5 danah vawikhat…
Kan hma lawka inthlang mai tur kan ni a; ni 6 vel chauhvin min kardan ta. Kum nga chhunga kan aiawha rorel tur kan thlang leh dawn a ni a, inthlanna hi khua leh tui tha chuan uluk takin a hmachhawn tur a ni a, tih takzet rilru pu chunga vote kan thlak theuh chuan roreltu tha tak hi Chunglam pawhin min ruahmansak ngei a rinawm.
Mipuiin kan aiawha rorel tur thlang turin kum nga danah vawikhat chiah vote kan thlak thei a; chu pawh chu kan thlak peih lo a nih chuan, ram inrelbawlna a chhiat a thatah mawhphurhna lak kan tum lo tihna a ni a. Eng pawh kan chungah thleng se, phunnawi thei kan ni lo vang.
Heti zawng hian han ngaihtuah chhin ila. Khaw pakhata cheng mipuite chuan huan zau tak an inneih tawm a. Huana hna thawk tur aiawh pakhat theuh ruat tur a ni. Mr. A chuan huana hna thawk tur aiawh a tir ve lo a, mahse huan thlai tharchhuahte leh hnathawktute chu a sawisel peih hle mai a. Mr. B chuan, “Huana hnathawk tur i tir ve lo va, phunnawi thei i ni hlei nem. I aiawh thawktu tur i tirh theih lai khan ngai pawimawhin aiawh rawn tir ve ni la chuan, tun ai hian kan that phah thei asin…” tiin a lo a lo zilh a.
Kum nga chhung hian ni 1825 a awm a, ni 1825 dana vote vawikhat thlak turah ni khat hun kan inpe thei lo emaw, kan inpe duh lo emaw, ram roreltu tur kan ngaihtuah peih lo emaw a nih chuan, ram inrelbawlna thil a chhiat a thatah, sawisel thei tur kan ni awm lo ve.
Ni 1825 chhung hian hmun dangah kan awm bo daih pawh a ni thei e; kan aiawha roreltu tur thlan hun a lo thlen hi chuan, vote thlak tura mahni khaw lam pan vang vang hi, insengso deuh dawn pawh ni ila, insensona hlawk leh duhawm a ni a; a chhan chu roreltu tur i thlang thei dawn miau a.
Election Commission pawhin vote thlak pawimawhzia hriain vote nei tawh phawtin vote an thlak theih nan ruahmanna hrang hrang a siam a. Tar chak lo, upa tawhte leh pianphunga harsatna neite pawh an kal chilh a. Hetih lai hian, khua leh tui mawhphurhna hlenchhuaka midangin vote an thlak laia, kut ke kim nei, dam tha, vote nei bawk si, vote thlak lova lo awm mai mai kan nih bik chuan, inbih chian kan ngai hle tihna a ni ang.