Kum 61 hnua British mipui lawmna

Wimbledon khelhna ram Britain mipuite chuan kum 61 chhung teh meuh an nghah hnuah tun Pathianni khan boys’ singles title lawm tur an nei ve leh ta hram a, tual-chhung rawlthar Henry Searle chuan final-a a khingpui Russian fifth seed Yaroslav Demin lakah 6-4, 6-4 hnehna changin, home fans lawmna a thlen.
Rawlthar kum 17 mi Searle hian title a lakna kawngah seeded player pali hnehin, title a hlawh-chhuah hnuah Court One-a inkhelh ropui a tih thu sawi chungin rim taka a thawh chhunzawm zel tur thu a sawi.
Henry Searle hi kum 1962 hnu lama British boys’ singles champion hmasaber niin, kum 61 zet an nghah hnuah Wol-verhampton rawlthar hian British mipui kut a bentir leh a; kum 2008-a girls’ champion Laura Robson hnu lamah Britain-in junior champion an neih leh vawikhatna a ni bawk.
Henry Searle-a serve nat ber hi darkar khata mel 134 zeta chak niin, kumin Wimbledon men’s competition main draw-ah khan Briton rawlthar aia serve na chu player 14 chiah an awm.
Boys’ U-14 title pawh British chan niin, Mark Ceban chuan 7-6 (7-5) 6-3-in final-a a khing-pui Svit Suljic a hneh a; Britain tleirawl Hollie Smart erawh girls’ U-14 final-ah chak zo loin Luna Vujovic lakah 6-3 6-1-in a tlawm.