S. Rolianthanga
Khatla
Phone No. 9436141536
-- Advertisement --
1. Tahrik Ni 20 May, 2023 hi kum 75 ka tlin kum a lo ni ve ta a, hetih rual hian January ni 18, 2023 kha Aizawl khawpui laili atanga Assam Rifles sawn chhuah tum a mizote hmalaknain kum 75 a tlinna a nih ve avangin thangtharte tan thudik an hriatfiah theih beiseiin Aizawla Assam Rifles ram dinhmun leh sawn chhuah tuma mizote hmalakna ka rawn tarlang ve dawn a ni.
Kum 1980-2009 chhung khan Land Revenue & Settlement Department-ah Survey Officer hna ka lo thawk ve a, Assam Rifles ram dinhmun leh mizo ten Aizawl khawpui laili atanga sawn chhuah tum a kan hmalaknaah thil nihna diktak chu hre ve thawkhatah ka inngai a ni.
2. Governor Aizawl-ah : India independent hnua Assam Governor hmasa ber Sir Akbar Hyderi KCSI, PC, ICS chu Aizxawlah January 18, 1948-ah a lo thleng a; ni li a cham a. Politiks hruaitute a huho a kawmna a nei a. Mizo Union chuan tualchhung mamawh leh harstana tam tak a thlen a; chung zingah chuan hengte hi a tel a ni :
(a) Mizoram (Lushai Hills) depa Mizo hnam zawng zawng huam telin, Mizoram ramri kham that leh ni rawh se (Mizo re-unification)
(b) Sipai leh civil mite nunphung hi a danglam avangin inawmpawlh hi a fel lo a. Chuvangin, Aizawl khawpui lailia Assam Rifles Cantonment (hmun) hi khawpui dai lamah sawn ni rawh se. Tin, Assam Rifles sakawr in (New Market ni ta) leh an Rifle Range (Electric Veng leh Chanmari Veng ni ta) te hi sawn bo ni bawk rawh se.
3. District Advisory Council : District Council hmasa ber din a nih theih nana dan nepnawi (rules), Sixth Schedule para 2(6)-in a tuk anga siam ngaite Sawrkarin a lo duan lawkte chu Advisory Committee chuan ngun takin a thlir a; tihdanglam tam tak a nei a ni.
Tin, chung bakah chuan he District Advisory Commitee hian District Council hlimthla a nihna angin, Mizo mipuite mamawh leh thil tul tam tak a nei a ni.
August 28-29, 1950 (Chairman : Bishop)
(ii) Assam Rifles (Aizawl) Sakawrin (Mule Shed) hi a awmna hmun (tuna New Market ni ta) atang hian sawn ni rawh se.
February 26-27, 1951 (Chairman : R. Thanhlira)
(ii) Aizawl khua hi thang zelin, a lo tawt tak avangin Assam Rifles Sakawr chaw huan, Chandmari (Rifle Range) phei hnuaia mi hi mipui mamawh atan hman ni tawh rawh se. (Hei hi tuna Electric Veng leh Chanmari Veng ni ta awmna hmunte hi an ni.)
April 27- May 2, 1951 (Chairman : Borhsap)
Hemi tum hian Advisory Council leh Committee inkhawm ho a ni a. District Council hmasa ber atan dan (rules) tam tak ngaihtuah leh rel a ni a. Chung bakah –
(i) Aizawl khawpui enkawltu, Town Committee din ni sela. Member mipui thlan 10 bakah Borhsap, Civil Surgeon leh SDO (PWD) te chu Member (ex-officio) ni se. Town Committee huam chhung chu Tlangnuam leh Laipuitlang inkar ni phawt rawh se tih a ni. (Heng hun lai hian Medical-ah Civil Surgeon leh PWD-ah SDO te hi an hotu berte an ni)
June 29,1951 (Chairman : Borhsap)
(i) Aizawl khawpui lailia Assam Rifles hmun (Cantonment) awm hi sawn chhuan ni se tih Pu R. Thanhlira rawtna chu sawi ho a ni a. He sipai hmun (Cantonment) hi Zemabawk-ah emaw, Maubawkah emaw, khawpui dai hmun remchang dangah sawn chhuah ni se tih chu remtih vek a ni.
4. Lushai Hills Superintendent, Mr. L.L. Peters ICS (1947-1949) chu Mizo Union nawrhna avangin pension a kal luihtir a ni a. Borhsap S.N. Barkataki IAS (Assamese) chu March, 1949-ah a lo chhuak a, ani hian Deputy Commissioner hna 24-01-1953 thleng a thawk a ni. Lushai Hills Superintendent tih lo ni thin chu 1st April, 1952 atangin Deputy Commissioner a thlak a lo ni ta a. Borhsap S.N. Barkataki ho a Aizawl laili atanga Assam Rifles hmun sawn tumna, June 29, 1951 a thuthlukna mumal tak an neih tak avangin Assam Rifles ho pawhin Aizawl a an ram luah chu pass dilna Borhsap hnenah an thlen ta a ni. Hetih lai hian Assam Land and Regulation, 1886 hi Mizoramah hman ve theih loh a nih avangin Land Law tlawhchhan chuan Land Pass/Lease a pek theih lova, amaherawh chua tulna avangin Superintendent / Deputy Commissioner ten thuneihna an neih angin Executive Order or Standing Order in Land Pass/Lease chu an pe ve mai thin a ni. Tichuan, Assam Rifles ram luah chin chu Deputy Commissioner aiawhin Pu Sainghinga, Political Assistant to DC Lushai Hills (Pu Sainghinga hi Zarkawt a awm a ni) leh Assam Rifles aiawhin Captain J.S. Halliday ( A ni hi Chaltlang a cheng a ni) ten uluk tak a survey and demarcated neih a ni a. Ramri lungte chu ramriah phun vek a ni a, ramri hrilhfiahna pawh chiang tak a siam vek a ni a, sketch map pawh fel tak a siam a ni. Main Barrack Area hi sawi buai lai deuh ber a nih avangin a tlangpuiin han sawi ila a tha ang :-
“Dak Inpui sir a A.R Gate bulah sawn Boundary Pillar No. 1 phun a ni a, chuta tang chuan kawng sirah khawchhak hawi zawngin a chhuk thla a, Venghlui tuikhur a zu man ta a. Venghlui tuikhur atang hian Bethlehem Veng panna footpath a zawh thla a, A.R Sweeper Lane/Quarters thlengin. Chu A.R Sweeper Quarters atang chuan Bazar Bungkawn panna footpath hmar thlang hawi zawngin a zawh leh a, he footpath hrulah hian a khat tawkin Boundary Pillar phun vek a ni a. He footpath hi tuna P.W.D Road chung zela kal a ni. Bazar Bungkawnah hian Pu Shillonga building kawtah hian A.R. Hospital North Gate an tih chu a awm a, chu chua man chho ta a. Heta tang hi chuan chhim hawi zawng a lamlian a zawh zel a, Treasury Square a Dak Inpui bula pillar no. 1 kha a man leh ta mai a ni. He ramri kham hi Assam Rifles aiawhte nen vawi tamtak kan tlawh tawh avangin ka hrechiangin ka hria. Tichuan, Assam Rifles’ Land Pass – STANDING ORDER No. 11 of 1952 chu Dt. 08-07-1952 ah pekchhuah a ni a. Assam Rifles aiawhin Lieutenant Colonel – Manga Ram, Commandent – 1st A.R. (LH) Bn. an a pawmpuina Dt. 01-07-1952 ah a pek hnuin tihchhuah a lo ni ta a ni.
He Standing Order clause No. 1 ah hian Land pass boundary-in a huam chhungah chauh Right of Occupation pek a ni. Standing Order clause No.3 ah hian Khatla Veng a an ram luah chu a tul hun apiangah Mizoram sorkarin a hmang thei ang tih a nih avangin an ram luah zat ve chu New Capital Complexatan sah thlak sak an ni. He Standing Order hi Assam sorkar , Department of Tribakl Areas pawhin a lo pawmpui a, vide No. TAD/LF/6/51/68 – Dt 6/10/1952 Assam Gazette, October 8, 1952-ah tihchhuah a lo ni ta a ni.
5. Tun laiin Assam Rifles Land Pass Standing Order No 11 of 1952 chhungah House Pass/ LSC engemaw zat a ruk a pek ni awmin sawi a ni a. Ka hriat chinah chuan Assam Rifles Land Pass chhungah Pass/LSC pek a awm lo,
6. Mi tam tak rilru tibuaitu chu Assam Rifles hian rambuai lai khan an Land pass huam bak, an duh chen chen a zau chu an ramah chhalin an ram angin an cheibawl a chung dan lova an ram hauhte huam tir a, Land Lease Certificate thar siam turin Revenue Departmentah vawi tamtak dilna an thlen a. Amaherawhchu an dilna chu an Land Pass Clause No. 1 a kalh avangin an dilna a hnawl sak zel a ni. Vanduai thlak takin Zokhawsang khaw hmun hlui a A.R. sawnna tur a Advisory Committee a din a nih khan A.R. ho duhthusam kha an lo pawmsak tak avangin A.R. ram luah chhung a House Pass/LSC tam tak a awm vangin hriat a lo ni ta a ni.
Tichuan, buai lohna tura kan buaina chhan ber chu Mizoram sorkarin a duhthawh luat avangin Assam Rifles Land Pass, Boundary Description chiangkuang tak ang ni lova ruahmanna dang a kalpui ta hi a ni. Kum 75 chhung kan hlawhtlinnate hi chhut ve thin ila a tha ang. Assa Rifles Firing Range Chandmari atanga Chite Luia sawn a nih avangin Chanmari Veng leh Electric Veng kan neih phah tawh a. Assam Rifles sakawrpu ho hmun Khatlaa an complex a sawn a nih avangin New market hmun kan neih phah bawk a. Khatla veng a Assam Rifles ram zatve lai New Capital Complex atan kan chhuh sak tawh bawk a. Khatla veng a an hmun hlu tak Mizoram Police Headquarter Complex atan kan chhuhsak tawh bawk a ni. Dik tak chuan Assam Rifles ho hi kum 1890 atang a Aizawl a awm hmun lo khuar tawh te an ni a, an inpekna a hlu hlein ka hria lawmna chang i hria ang u.
7. Tunlai hian mimal House Pass/LSC te cancel tumin Revenue Department-in Show Cause Notice a pe a. Ram petu leh an pek chhan pawh hrechiang bertu leh Land Records pawh kawltu in an ram pekte insawifiah tur a tih hi thil letling tak niin ka hria. Ram neitute tan chuan High Court emaw Supreme Court an thlir ve reng turah ngai ila, an tanchhan turte chu hengte hi an ni tlangpui ang :-
1) Assam Rifles Land Pass, Lushai Hills Standing Order No. 11 of 1952 issued by S.Barkataki, Deputy Commissioner, Lushai Hills Dt. 28/6/1952 leh The Assam Gazette, October 8, 1952
2) Article 14, 19 (e) and 31 (A) of Constitution of India
3) The Scheduled Castes and Scheduled Tribes (Prevention of Atrocities) Act, 1989, vide Section 3 (1)/(f)/(g).
4) Right to Fair Compensation and Transparency in Land Acquisition, Rehabilitation and Resettlement Act, 2013
5) Section 7 and 8 of The Mizo District (Land and Revenue) Act, 1956.
6) Rule 3(3) of he Mizo District (Land and Revenue) Rules, 1967.
7) Section 2(3)/(9)/(14)/(41)/(45)/(47) of the Mizoram Land Revenue Act, 2013
8. RAWTNATE
1) The Mizoram (Restriction on use of Transferred Land) Act, 2002 hi awmze nei a hmang tur chuan Legal Encumbrances emaw Legal Claims tihfel hmasak a ngai a, chu mi a nih loh chuan dan hman theih loh a ni thei ang. Tun a Pass/LSC neitu thenkhat buildingte an lo sa ve tawh a, an chenna ai chuan a tawp thleng a tankhawh an tum ang tih chu thil chiang tak a ni. High Court emaw Supreme Court-in he dan thar hi lo hnawl ta se sorkar tan mualpho thlak tak a ni ang.
2) Mizoram sorkar hian dan hmang dik lova harsatna chinfel a tum anih chuan engtikah mah a tihfel theih ka ring lo. (Ukil rual thahnem tawk takin an lo thlir ve reng a ni.) Chu ai chuan ram neitute dawhkan kil a sawipuiin harsatna tihdam dan zawng ta zawk se a fuh zawk ka ring.
3) Mizoram sorkar hian Legal Compensation pek tur a neih chuan pe mai sela, chu chu chinfel dan chikhat chu a ni a.
4) Mimal ram neite inhmun insawnna (Transfer-na) tur hmun remchang dang ngaihtuah sak sela, chu chu kawng khat chu a ni.
5) Mizoram sorkar leh tlawmngai pawlte pawh hi duhthawh lutuk tawh lo ila, Assam Rifles Land Pass Standing Order No. 11 of 1952 ang hian Assam Rifles ram luah chin hi teh that leh a, hma thar lak mai chu a fin thlak ber turah ka ngai.
(Thil chiangkuang zawka hre duh tan a chunga phone no. ka tarlanah hian biak theih reng ka n