Hunin tumah a nghak lo, tia sawi a ni a. Chutak chu kum 80-a upa Joe Biden tan chan harsatna ni thei a ni thung. US president ni mek hian kum chu harsatna siamtu a ni love tiin voter te a hneh thei ang em?
Thawhlehni khan Biden chuan White House kum li dang luah leh a duh thu a puang chiang ta a. Americans te erawh NBC News poll atang chuan an chiang vak lo thung.
Survey neiha Americans 70% te leh Demcorats 51% te chuan chuh tawh lo se an duh daih a. Chuta chuh tawh lo se tia an sawina chhan ber chu a kum a ni tlat bawk.
Biden hi US history a president upa ber ni sa tawh a ni a. Inthlanah chuh leh se tling se lakluh a nih meuh chuan kum 82 a ni tawh dawn a, kum li dang president a nih zawh meuh chuan kum 86 a ni daih tawh dawn a ni. US sorkar in acturial tables a siam anga chhut chuan Biden hian thla 12 chhunga thih theihna 8% a nei mauh bawk.
Biden an president nih leh a tumna chhan video hmanga a sawi tlangzarhah ‘personal freedoms’ te Republicans te laka humhim a duh vang tia a sawi chuan a kum chungchanga inhnialna awm thei a khawih hauh lo.
Video-ah chuan Vice-President Kamala Harris, Biden a hmantlak loh thutse a aiawh tur pawh tarlanin a awm a. Harris chu kum 54 a upa niin Biden team te chuan campaign ah energy tam zawk a belh theih an beisei a. Kum 2012 a Barack Obama re-election video campaign-ah kha chuan a vice-president te pholanin an awm ve lo.
He video a tawk dawn hauh lo tiin veteran political consultant Bob Shrum, director of the Center for the Political Future leh Democrats Al Gore and John Kerry presidential campaigns senior adviser chuan a sawi.
“Kum lama zawhna neih te chu campaign dang hmanga chhan i tum a, chhanna i siam chu a tawk hauh lo” tiin Shrum chuan a sawi a. Kum lama zawhna chu Biden an campaign a neih tak tak hunah tihsual palh a neih chuan harsatna thlentu tur a ni ang a ti bawk a.
Republicans te chuan Biden a tihsual neih thin te chu amah beih nan bera an hman tawh niin nikum pawh khan House of Representatives a Republicans 54 te chuan White House ah lehkhathawnin Biden a rilru dinhmun ah ngaihthatlohna an neih thu sawiin Biden chu dementia test nei turin an phut thu an ziak a ni.
Lehkhathawnah chuan Biden-ah tun hnaia sawisual leh tihsual a neih thahnem tak te ziahlanna an nei zui a. “Tun hnaia a sawi sual tam tak te hi tihpalh a ni lo va, a hriatna tlakhniam tawhzia pholanna zawk a ni” tiin lehkhathawnah chuan ziah lan a ni.
Chu tak chu Republican presiddential nominee nih ngei tum Donald Trump chuan dim lo baksaka a pholan niin nikuma midterm congressional election ah pawh Trump chuan Biden a hriat hmaih leh dangawkna hrang hrang video a phochhuak a.
“Joe Biden-an chiang takin thu a sawi thei lo” tiin Arizona a rally a neihnaah sawiin, “Fim takin a ngaihtuahna a hmang thei lo” a ti zui bawk.
Jim Messina, Barack Obama re-election campaign manager thin chuan Democrats te chuan Biden aia kum li leka naupang Trump chu an beihlet ve tur thu sawiin, “Voters te u, enta che u, an pahnih hian an upa ve ve tawh an ti ang” tiin Messina chuan a sawi a, “A tu zawk hi nge ka nun nuam zawka siam thei ang min hrilh ru” tiin an sawi ang a ti bawk a.
“Democarts te chuan zantin tih pakhat an nei ngei thin” tia sawiin, “Kan thu a, kan thingthi a, Pathian hnenah tawngtaiin Donald Trump chu Republican tena president atana an nominee ni ngei se kan ti” tiin a sawi bawk.
Kum li kalta pawh khan Biden chuan a kum thuah zawhna nasa tak a tawk tawh a, Covid-19 pandemic a leng zui a, chutah national primary leh general election campaign-in a zui a. Mahse, a tawpah chuan Biden an Trump a hnehnaah a kum chungchang chu issue a ni ber hauh lo thung.
Tun hnaia NBC tena poll an lakah Biden-an inthlanah a chuh leh dawn a nih chuan Democrats 88% te chuan an thlawp tur thu an sawi tih a ni bawk a.
“Biden hi namnul a ni reng fo” tiin Shrum chuan a sawi a, “Kum 2020 khan namnulin a awm tawh a. Primary hmasa berah tling lo tur chiangsa an ti a, mahse, kha primary ah khan nasa takin hnehna a chang a nia,” tiin Schrum chuan a sawi bawk.
Khawvel ram dang ang lo takin America chu kum 65 chunglam tena politics an thunun a la ni ta reng a, khawvel ram dangah chuan ram hruaitute an naupang tial tial thung a. America-ah chuan president dinhmun chelh turin mipa kum 70 chunglam mingo a ni tur a ni tia ngaihdan a nghet tia sawi a ni.
Joe Biden erawh American tam tak te ngaihhlut a la ni reng a, senator, vice-president pawh ni tawh leh America tana indonaa penchhuak tawh a ni bawk a. Mahse, kum 80 ni tawh chu a muang tawh a ni tia ngaihdan a awm nasa hle bawk.
Kum 80 pel tawha President nih la tum tlat
Get real time updates directly on you device, subscribe now.
Prev Post
Next Post