Kum hmasa ang velin December a vawt

Kum hmasa ang velin December a vawt
Thlasikin Zoram a tuam mek a, tunah rih chuan khaw vawh lam hi thlasik hmasa ang vel a ni. December thla kha 2024 December ang vel a ni a, January pawh a la vawt zual vak lo.
State Meteorological Centre chhinchhiahnaa a lan danin, 2025 December-ah khan Aizawl vawh ber laiin, ni 20-ah khan 11°C a ni a, 2024 December-ah pawh khan khaw vawh ber laiin 11°C tho a ni (2024 December ni 12-ah).
Lum leh vawt tehnaah hian ni khata a vawh ber lai leh a lum ber lai an chhinchhiah thin a, khua a vawt em tih hriat nan a vawh ber lai chauh ni lovin a lum ber lai a pawimawh tel; 2025 December ni 20-ah khan a vawh ber laiin 11°C a ni a, 11°C hi a vawt lutuk lo a nih pawhin khami ni khan a lum ber laiin 20°C a ni a, 20°C hi a lum lo. 11°C leh 20°C hi chawhrualin a lum lo a, chuvangin khami ni khan khua a vawt ang.
December ni 31 khan a vawh ber laiin 12°C a ni a, hei hi ni 20 tih lohva a vawh ber lai a ni. December ni 31-ah pawh hian a lum ber laiin 20°C a ni a, khami ni kha a vawt ang.
Nikum November-ah khua a vawt tawh a, a vawh ber laiin 15°C a ni. December a vawt sawt a, January hi vawt leh zual tura ngaih a ni.
Mizoram thlasikah January hi khaw vawh ber thla a ni thin a, kuminah kum dang January aiin a vawt rih lo. Ni 3-ah khan a vawh ber laiin 11°C a ni a, hemi ni hian a lum ber laiin 19°C a ni. Ni 4-ah khan a vawh ber laiin 10°C a ni a, a lum ber laiin 18°C a ni. January ni 4 hi tun thlasik kal meka a vawh ber tum a ni rih.
Tun hnaiah Mizoramah thlasik a rei telh telh tiin a sawi theih a, tun hnai kum thum kum li vel enin February-ah pawh khua a la vawt thin. March thla a la vawh chang te pawh a awm.