Kum kaltaah Mizoramin chhiah vbch. 1112 lalut
Kum 2023- 2024 chhungin Mizoram Taxation department chuan chhiah cheng vaibelchhe 1112.58 a lalut.Taxation department-in revenue a hmuhna hrang hrang chu – GST, Mizoram VAT leh profession tax a ni a. Heng zingah hian GST atangin revenue lut a sang ber a, Mizoram VAT hnuaiah hian GST hnuaia lut ve lo petroleum products hrang hrang atangin chhiah lak a ni bawk. Profession tax hi dan ang taka eizawnna neite hnen atangin an sum lakluh atanga lak thin a ni.
Mizoram sawrkarin kum 2023- 2024 chhunga Taxation department revenue lakkhawm tura a bituk chu, budget estimate-ah ah vbch. 1000 a ni a. Hei hi revised estimate-ah vbch. 1098.50 a tihsan a ni. Taxation Department hian an (RE) target hi vbch. 14.08 a khumin, vbch. 1112.58 an lalut a ni.
Kum 2023 – 2024 chhunga an thawhchhuah a punna hi zaah 9 a ni a. Mizorama GST luhna liantham pakhat chu sawrkar hnuaia works contract hna a ni tih department hotute chuan an sawi. Tunhnaiah SASCI leh PMGSY hnuaia works contract thawhna bill, contractor-te hnena pek chhuah a tlem avangin GST revenue collection hi engemawchen a nghawng tih sawi a ni.
‘Hei hi chu contactor-ten bill an lak huna pung chho leh mai tur a ni a. A thla bia kum kalta nena khaikhinin thla thenkhatah chuan kum kalta phak loh chang hi a awm ve fo thin a, hei hi India ram state dangte dinhmun pawh a ni. GST tax revenue hi bungrua hralh leh service hralhna atanga lo lut a nih miau avangin sumdawngten an inhralh that leh that lohah, contractor-ten bill an lak leh lak loah a innghat thuk a ni,’ department thuchhuak chuan a ti.
2023-24 a chhiah (tax revenue) luh dan
GST – Rs. vbch. 970.25
VAT – Rs. vbch. 125.93
Prof. tax – Rs. vbch. 16.37
* GST hman a nih hmaa entertainment tax atanga chhiah ba lut Rs. 30000 leh Firms & Societies registration fee Rs. 2,19,370.00 a tel bawk.
Kumtina Taxation department revenue lakluh a pung chho zel a. Kum 5 chhunga a pun dan chu:
2019-2020 – Rs. vbch. 667.28
2020-2021 – Rs. vbch. 677.83
2021-2022 – Rs. vbch. 894.75
2022-2023 – Rs. vbch. 1020.66
2023-2024 – Rs. vbch. 1112.58