Kum kaw tang tura tih Robinho!

Brazil, Manchester City, Real Madrid leh AC Milan forward hlui Robinho kha kan la hre vek ang a, ani pawh kha a chipui Dani Alves ang bawkin mi ramah pawngsual thubuai awrhtir a ni a; Alves ang lo takin thubuai a neihna ram chu manbeh a nih hmaa chhuahsan hmanin, an ram Brazil-ah a tlanlut hman hlauh a; Brazil ram danah mi rama thubuai nei leh thiamloh chantirte an ram atanga mi rama hremna tuar tura thawnchhuah theih a ni lo a, mahse, Italy sawrkarin Brazil sawrkar an ngen angin Robinho hi Nilaini khan an ram lung ina kum kaw chhung tang tura tih a ni!
Kum 2013 daih tawh khan Italy ramah pawngsual rawn (gang rape) a thleng a, pawngsual rawn tawktu chu Albanian hmeichhia kum 22 mi niin, pawngsualtua puhte zingah tuna kum 40 mi ni tawh Robinho hi a tel ve a; kum 2017 khan Italian court chuan midang rualin Robinho pawh hi thiamloh a chantir a, mahse, rorelna a hmachhawn hmain an ramah a thlawklut a, hima ngaih a ni hman.
Case an ngaihtuahna Italy ram sawrkar chuan tlawm mai tum loin Brazil sawrkar hnenah mi rama hremna tuar tura thawnchhuah theihna dan nei lo mah se Robinho chu a thiltih man hmu tura an ram lung ina khung turin a ngen a, Nilaini khan Brasilia khaw roreltute chuan Italy ngenna pawmin kum kaw tanna tur thutlukna an siam ta a ni.
Ukilte sawi danin Robinho hian lung in a rap nghal mai dawn lo a, a chunga thutlukna siam tak chu khinlet phalsak a ni a, chutih chhung chuan a la zalen rih ang.
Ram tana game 100 khel tling Brazil international hlui hi pawngsualtua puh a nih lai khan Milan player a ni.
Italy rama thiamloh a chan hnuah a chunga hremna tla chu kum 2020 khan a khinglet hlawhchham a, kum 2022-ah Italy rama court sangber chuan Robinho chunga hremna lo pek tawh chu a tharthawh leh a, Italian ukilte’n Robinho manna turin ‘international arrest warrant’ an tichhuak zui ta nghe nghe.
Pathianni khan Manchester City tana kum hnih khel ve hman Brazilian chuan pawngsuala an puhna chungchang Brazilian network hnenah sawifiahin, tihluihna ni lo, a tel-a-te remtihna ngeia sex hmangho an nih thu a hrilh.
Real Madrid-a season li a khawsak chhung khan Robinho hian La Liga title pahnih lakpui hmanin, September 2008 khan transfer deadline day-ah khatih laia British record fee (£32.5m)-in City a zawm a; Etihad club a zawm ni kha Arab pa hausa tawntaw Sheikh Mansour-a’n Premier League club a ta neih ni tak a ni nghe nghe.
England-a season hnih a khelh hnuah AC Milan a pan a, chuta tangin kum nga chhung Chinese side Guangzhou Evergrande thuam a inbel leh a; a career hnuhnung chu an ram club Atletico Mineiro-ah a hmang thung.