Kum tharah hmunphiah grading ti tawh dawn lo
Kum tharah hmunphiah grading ti tawh dawn lo
Sawrkarin loneitute hnen atanga hmunphiah a lei tawhah grading (Grade A leh B) a then chu a chingtute tan harsatna a siam tam avangin kum thar atang chuan grading hi tih a ni dawn tawh lo.
Land Resources, Soil & Water Conservation department hmalakna thlirin Thawhlehni khan chief minister Lalduhoma hoa thutkhawm a ni. An thurel zingah hmunphiah grading tih tawh loh hi a tel a. Departmental works kalpui a nihin department thenkhatin an project-ah GST an chhut tel loh avangin sawrkarin chhiah tam tam tak a chan thin a. Department zawng zawngin departmental work kalpui dan tur sawrkarin a duan ang thlapa kal tur a ni tih sawi nawn a ni.
Thutkhawma report danin, CM Rubber Missions thawh khatnaah cheng nuai 2798.13 dah a ni a, kumin a kum khatnaah nuai 1364.14 sanction tawh a ni. Sum hi NABARD RIDF XXX atanga hmuh a ni a, Kolasib leh Mamit district-ah kalpui phawt tur a ni. Kum tharah district dangah tih zel a ni ang. Kumtin hectare sang khat zel phun belh tum a ni a. Kuminah loneituten an phun hman ngei theihnan a chi supply rang taka bawhzui tur a ni.
Chief minister chuan an sawrkarin thil thar an ching chhuak nual a, sawrkar hnathawkten tha taka an thlawp an beisei tih a sawi.
“Hna hi thawh chak kan duh a, kan ram hian hmasawnna hmel hmu thuai thuai ila kan duh. Chuvangin heng thil thar hi kan kalpui a ni,” a ti.
Department ho hnathawh thlirlet pui chu thil dik lo zawnga buatsaih a ni loa, an harsatna leh mamawh an hriatsak duh vang zawk a ni tih a sawn nawn bawk.
Thutkhawma thurel leh sawilan dang:
8 Soil department allocation of business thenkhat enthat a ngai nia ngaih a ni.
8 Coffee chu Soil department crop-ah dah zui zel tur a ni.
8 Saitual office cum quarters enkawlna tur sum ennawn nise tih a ni.
8 CM Rubber Missions a hlawhtlin lehzual theihnan Rubber Cluster Link roads ngaihpawimawh dan dap nise.
8 Rubber ching mekten an mamawh em avangin cluster-ten inhmantawm tur subsidy-a pek atan Bana Kaih atangin rubber rolling machine set chu 100 tal ngaihtuah nise, tih a ni.
8 Department hmalakna dang – Bana Kaih, RKVY, PMKSY, NABARD RIDF kaltlanga thawh pawh thlirlet a ni.
8 LRS&WC hnathawh langsarte chu – hillside terracing, water tank, soil conservation works bakah link roads, warehouse sak a ni.
8 Cash crop plantation – rubber, coffee, hmunphiah leh kuhva an enkawl bawk a. Kuva rah process-na tur NEC fund atangin Chemphaiah leh Zamuangah din mek a ni.