Kum tling lova nupui pasal neih chungchang sawiho

Kum tling lova nupui pasal neih chungchang sawiho
Nilaini khan kum tling lova nupui pasal neih ven kawnga hmalakna ‘Prevention of Child Marriage’ chungchang ngaihtuahin Champhai District bawrhsap James Lalrinchhana, Child Marriage Protection Officer ni bawk hovin DC Conference Hall-ah meeting neih a ni.
District bawrhsap chuan sokarin kum tling lova nupui pasal neite a ngaimawh thu sawiin, India ram hmun dang dangah naupang kum tling lova inneihtir an awm thin chu dan phal loh a nih thu a sawi. Kum tling ngeia nupui pasal neih thatna leh kum tling lova nupui pasal neih avanga harsatna thleng tinte inzirtirna neih tam a pawimawh thu a sawi a, dan phal loh tihrem kawnga tanrual puiah kalkhawmte a sawm a ni.
Lalrinmuana, District Program Officer, Women & Child Development Department chuan India rama hmalaknate khairual taka kalpui thin a nih avangin Mizoramah child marriage chungchanga hmalakna pawh sorkar laipui duh dan anga kalpui a nih thu a sawi. Child Marriage chungchanga awareness campaign neih tawh dante a tarlang bawk a. Sawm bik kalkhawmte chu tawn hriat nei tura ngaih an nih avangin inrawnkhawmna chuan rah tha a chhuah ngei a beisei thu a sawi bawk.
Danin innei thei tura a phal chin, mipa kum 21 chin leh hmeichhia kum 18 chin chungchangte sawiho a ni a, a tlangpuiin India ram hmun danga thleng thin naupang inhualna leh inneihna awm thinte Mizoramah a awm lem loh thu tarlan a ni.
Sorkar dan ding laiin dan anga innei thei tura kum a bithliah zat, mipa kum 21 leh hmeichhia kum 18 chinte zawma kumtling ngeia an inneih theih nana hmalak dan turte rel a ni a, kohhran hrang hrang, NGO leh zirna inahte hemi hawi zawnga hma an lak tawhnaah lawmthu sawi a, theihtawp chhuah zel tura ngenna siam nise tih a ni a. Heng bakah kum tling lova nupui-pasal neih Child Marriage-in nghawng thalo a neihte inzirtirna tam zawk, hmalak theih dan hrang hrang kaltlanga neih nise tih a ni bawk.
He hunah hian Line Dept hnuaia thawktute bakah Child Welfare Committee, Champhai member-te leh Kohhran hruaitute an tel a ni.