Kum upa zah leh midang ngaihchan nachang hre lo kan tam hi sim a ngai – Lalmuanpuia Punte

Kum upa zah nachang hre lo leh midang ngaihchan nachang hre lo kan tam ta chu kan sim a ngai a, mahni chauh ingaihtuahna hi corruption chikhat a ni tih MLA Lalmuanpuia Punte chuan a sawi.
Hmunpui khua in YMA Day an lawm hmanpuitu adviser to CM Lalmuanpuia Punte chuan, YMA chu Mizoram hnam chelhdingtu, Mizo society tinuamtu a ni, tiin, a bikin chhiatni ah YMA hnuaiah Mizote kan inlungrualin, YMA zai ngaiin kan kal thin a. Mizo hnam rohlu a nih zia a tichiang tih a sawi.
Thangtharten tunlaiin mahni hma chauh ngaihtuahin, mahni hmasialna leh kan chhehvela cheng midang venthawnna kan nei ta lo lutuk chu inzir kan ngai tih a sawi. “Khawpuiah zanah midang tana hlauhawm leh a bengchheng em, tih ngaihtuah miah loa khawsa thin an tam. Kum upa zah lo leh midang ngaichang lo kan tam hi sim a ngai. Mahni chauh inngaihtuahna hi corruption chi khat a ni,” a ti.
Mizote chu hnam tlemte kan ni a, hnam humhalh ngai kan ni tih adviser to CM hian a sawi a. Kan chhehvel hnam lakah chuan tlem te kan ni, tiin, “Kan thenawm Assam khu hmanah khan nuai 350 bawr an ni tawh a, an tribal hnam tlem pawl pawh kan la zat lo. Development leh eng anga project tha pawh kan ramah lo thleng se, a ram neitu hnam kan ral si chuan awmzia a awm lo. Sikkim pawh tourism lamah sang hle mah se, a ram mi MLA pakhat pawh an nei tawh lo. YMA hian ram leh hnam humhalh ngaipawimawh ang u,” a ti.
YMA-in ‘Zirna Uar Kum’ a lo puang tawh thin tih a sawi a. “Mizo thalai All India Service-ah kan tling ta mang loa, vawiina Home department lama police lal tam tak chu hnamdang an ni ta. Kan office sang leh kan file khawihtute ah Mizo thalai kan pun tharna turin tan la ila, hna sang tak kher lo pawh central ministry-ah kan phak tawk apiang bawh ang u. Politician-te recommend ngaih lohna CRPF emaw BSF thleng hian tan kan hreh tur a ni lo,” a ti.
Mizoram khaw tam takin awmni khama YMA Day an hman theih tawh loh laiin, Hmunpui khua in a hma zan leh nileng bakah zan thlenga YMA Day lawmna programme an siam thei chu lawmawm a tih thu leh chhawmnung zel tura a duh thu Lalmuanpuia Punte hian a sawi a. YMA kumpuan ‘Ruihhlo do’ a nih laiin hetiang kawngah Hmunpui khuain harsatna an tawk lo chu a chhuanawmin branch dangte entawntlak an ni tih a sawi bawk.