Kumin atan IPR leh MJA inhlan thar Thu rintlak hrilh turin tan zual a ngai – IPR minister

Kumin atan IPR leh MJA inhlan thar
Thu rintlak hrilh turin tan zual a ngai
– IPR minister
Kumtina tih thin danin, Information & Public Relations department thawktute leh Mizoram Journalists’ Association member-te chu kum thar atan inhlan tharin Thawhlehni khan hun an hmang a. Hmanpuitu I&PR minister Dr Vanlalthlana chuan social media-a mahni duh zawnga news kaihlek nasa tak awm karah mipuiin thudik leh rintlak an hriat theihna atan journalist-te leh I&PR department an lehzual a ngai tih a sawi.
Technology a thang cha a, a bikin social media-ah mi tupawhin an duh dan leh ngaihdan an puangchhuak thei tawh a, thenkhat phei chuan tih chhuah tur an duh luatah thudik a nih leh nih loh thlu loin, chhiartu leh ngaithlatu neih ngah duh vangin a him leh him lo pawh thlifim loin mipui rilru an hruaikawi nasa hle nia a lan thu I&PR minister hian a sawi a. Mimal beihna atan thudik ziktluak lo hmanga thu thehdarh a, journalistic ethics engmah awm loa an duh duh an sawi mai thin an tam ta tih sawiin, “Hei hi kan vei a ngai. Journalist-in mipui hnenah thudik leh rintlak, phuahchawp ni lo an hrilhhriat thin chu nasa lehzuala kan tih a ngai a, I&PR department nen tangdunin theihtawp kan chhuah a ngai a ni,” a ti.
I&PR secretary Betsy Zothanpari Sailo pawhin I&PR department leh MJA member-ten thawhhona tha tak an neih chu chhunzawm zel pawimawh a tih thu a sawi a. Mahni tanghma um loa Mizoram tana tha tur ber ngaihtuah chung zela thawk turin a sawm. Sawrkarin a chhawr sawrkar hnathawk zingah hna thawk tha duh lote chu an hna atanga chawlhtir turin thutlukna siam a ni tawh a, Review Committee pawh din a nih tawh avangin inthlahdah leh thatchhiat vanga mahni hna thawk tha duh lote chu dim an ni dawn lo tih a sawi a ni.
MJA president C Lalrambuatsaiha chuan mihringin kan tuh rah kan seng thin a, I&PR department thawktute leh MJA member-te pawh Pathian duhdan anga kan thlarau nun mai ni lo, kan taksa kan vawn uluk a, hriselna kan ngaihpawimawh a ngai tih a sawi a. Sawrkarin I&PR department kaltlanga journalist-te tana tangkai tur press tour a buatsaih thin avanga lawmthu sawiin, tunhnaia Mizoram Journalists Pension Scheme a taka kalpui a nih taka vangin an lawm tih a sawi bawk.
Hemi hnu hian I&PR department officer-te leh minister Dr Vanlalthlana hi an inkawm a. Department hmalakna kal mek leh hmasawnna tur an sawiho.
Minister Dr. Vanlalthlana chuan information officer-te chu an mipui hnena thudik leh rintlak chauh hriattirtu ni tura tan la zel turin a fuih a. Hemi atan hian mahni inchher hriam a, training a tam thei ang ber tel tum turin a chah.
Inkawmnaah hian tunhnaia Indian Institute of Mass Communication (IIMC) Delhi-a a training nei zo hlim MIS officer-te atangin team leader, deputy director Malsawmsanga’n report a pe a. Department hmalakna leh hmachhawp hrang hrang officer-te hnen atanga ngaihthlak a ni bawk.