Kuminah ASF hmuh belh tawh lo

Kuminah ASF hmuh belh tawh lo
Kum 2025 bul tan atangin Mizoramah vawk natna hrileng, African Swine Fever chu a kai thar hmuh a ni rih lo. Hetihlai hian venthawn thilah Khawzawl district-ah hri a darh lohna turin inkhuahkhirhna siam thar leh a ni.
Kuminah January 22 thleng hman hnu in ASF hmuh thar a awm rih tawh loa, hetihlai hian Mizoram atangin he hri hi a la kiang lo nia ngaih a nih avangin Khawzawl district-ah hri a darh lohna turin inkhuahkhirhna siam thar leh a ni.
Khawzawl district magistrate chuan Nilaini khan dan tlawhchhana hriattirna tichhuakin, Khawzawl district huamchhungah India ram pawn leh ram chhung, state dang leh district dang atangin vawk, vawksa leh vawksa atanga siam thil reng reng lakluh leh thawn chhuah phal a ni lo tih a sawi a. Vawk damlo reng reng talh leh hralh khap a ni, tiin, vawk damlo chu dahhran thuai tur a nih bakah vawk thi reng reng thuk taka phum tur a ni tih a sawi. Vawk damlo leh thi a awmin District AH & Vety department official-te hnenah report thuai thin tura tiin, tualchhung vawk talh turten vawk hrisel tha ngei a ni tih finfiahna competent authority atanga nei turin a ti bawk.
He thupek zawm lo chu Section 223 BNS hmanga hrem theih an ni, tiin, thupek hi thupek dang tihchhuah a awm a nih loh chuan, chhuah a nih atanga thla hnih chhung a huam dawn tih a sawi a ni.