Champhai District Police-in kuminah February 16 thleng khan heroin cheng nuai 63 hu an man tawh a, Excise & Narcotics staff-ten nuai khat chuang hu an man tawh bawk.
District Level Narco Coordination Centre (NCORD) Committee Champhai District thutkhawm vawi 6-na leh kumin atana thutkhawm vawi hnihna chu Ningani khan an chairperson, bawrhsap James Lalrinchhana hoin neih a ni a. Champhai District Police leh Excise & Narcotics Department ten ruihhlo an man zat leh Narcotic Drugs & Psychotropic Substances Act (ND&PS Act) 1985 hnuaia case ziahluh dan report a ni.
Kumina thutkhawm hmasak hnulam, January 27 atanga February 16 inkarah Champhai Police hian ND&PS Act 1985 hnuaiah case 6 an ziaklut a, hemi kaihhnawihah hian mi 7 manin an zinga 1 hi ramdang mi a ni. Heroin hawng 187 (gram 2354) man niin, department chhut danin tualchhunga hralhna ang chuan Rs 56,10,000 hu a ni. Hawng 9 (119 gm) hi Assam Rifles nen tangduna man a ni.
Kumin January 1 atanga February 16 thlengin Champhai District Police hian ND&PS Act 1985 hnuaiah case 12 an ziaklut a, hemi kaihhnawihah hian mi 17 manin an zinga 4 hi ramdang mi an ni. Heroin hawng 210 (gram 2639.96) an man a, tualchhunga hralhna ang chuan Rs 63,00,000 hu a ni. Heng zinga hawng 16 hi Assam Rifles nen tangduna man a ni.
Kumin January 27 aanga February 16 thleng khan Excise & Narcotics Department Champhai chuan ND&PS Act 1985 hnuaiah case 3 ziaklutin hemi kaihhnawihah hian mi 5 an man a, heng zinga 1 hi ramdang mi a ni. Heroin gram 94 an man a, tualchhung rate-ah Rs 1,12,800 hu a ni.
Thutkhawma tarlan danin, Narcotics Control Bureau Branch office, Champhaia bunna tur hmunhma enfiah a ni a; NCORD Portal chu DC office leh SP office atangtein awlsam taka enfiah theih a ni tawh.
Kuminah heroin nuai 63 hu man
Get real time updates directly on you device, subscribe now.
Prev Post
Next Post