Kuminah India-ah mihring tluklehdingawn 1.46 tling dawn

Kuminah India-ah mihring tluklehdingawn 1.46 tling dawn
UN-in khawvel mihring pun dan a chhut lawknaah India-a cheng chu kumin chhungin tluklehdingawn 1.46 an tling dawn a, khawvela mihring tam berna ram a ni zel dawn tih an sawi.
Hetih lai hian UN-in a chhut danah hian India-a nau piang pun chakna chu a hniam hret a, thite thlakna tur khawp pawh a tling lo niin an sawi.
UNFPA-in 2025 State of World Population (SOWP) Report, The Real Fertility Crisis chuan nau pian pun chakna hian awm lote a khuh phak dawn lo niin an tar lang a. Mi maktaduai telin nau an neih theih zat aia tlem an nei niin an sawi.
Report-ah hian India-a hmeichhe pakhatin fa a neih chu 1.9 a ni a, hei hi thite thlak zo tura 2.1 a nih phak a ngaih laiin a phak lo a ni.
Hemi awmzia chu Indian nute hian pem awm miah lovin chhuan khat an liama chhuah dang an aiawh thei zat tur an hring tling tawh dawn lo tihna a ni.
Tun hnaiah nau piang tlem hret mah se India-ah hian thalai an la tam a, 24% chu kum 0-14 inkar, 10-19 inkar 17% leh kum 10 leh 24 inkar 26% an la ni.
India-a mihring awm 68% chu hna thawk thei rual (kum 15-64) an ni a, upa (kum 65 leh a chung lam) chu 7% an ni a, mihring dam chen a rei hret hret zel avangin kum sawm bi a liam leh chuan an pun ngei a rinawm a. Kum 2025-ah hian mihring dam chen hi mipaah kum 71 a nih laiin hmeichhiaah 74 a ni.
UN-in a chhut dan chuan tunah hian India-a mihring cheng hi maktaduai 1,463.9 a ni mek.
India hi khawvela mihring cheng tamna ber ni mekin kum 40 a liam leh hnua a tlem zawka a kal hma chu pung zelin an tam lai berin tluklehdingawn 1.7 chuang an tling tura chhut lawk a ni.
Kum 1960 khan India-ahhian mihring maktaduai 436 chuang awmin nu pakhatin fa paruk dawn nei zel ang an ni.
Hetih lai hian nuin an taksa an ngaihtuah lo va, nu palia pakhat pawh tling lovin invenna an hmang ve chauh a ni a, pahniha pakhat pawh tling lovin primary school an chhuak.
Tun hnaiah erawh zirna a sang a, hriselna pawh a tha a, hmeichhiaten an nunah thutlukna pawh an siam ngam tial tial a. Tunah hi chuan nu pakhatin fa pahnih leh tlem nei zel ang chauh an ni tawh.